Ispaniya hukumatining sportga daxldor yangi qonunida alohida band bo‘ladi - «Anti-Pike». Hammasiga «Barselona» faxriysining mamlakat superkubogi uchun o‘yinni tashkillashtirishdagi hamkorligi sababdir.
Ha, Jerar Ispaniya qonunchiligida iz qoldiradigan bo‘ldi.
Xo‘sh, Ispaniya hukumatining sportga doir yangi qonun loyihasiga kiritilgan «Anti-Pike» bandi mohiyati nima? Qonun hujjatlarining yakuniy tahriri allaqachon tayyor va tez orada deputatlar kongressida ovozga qo‘yiladi. Unga ko‘ra, faoliyati davom etayotgan sportchining o‘zi ishtirok etishi ehtimoli bor mamlakat musobaqalari bilan tijorat masalasida aloqa o‘rnatishi taqiqlanadi. Gap shundaki, o‘tgan yil bahorda Jerar Pike Ispaniya superkubogi turniri Saudiya Arabistonida tashkil etilishida vositachilik qilgani ma’lum bo‘lgandi. Aniqroq aytsak, «Barsa» sardori Saudiya Arabistoni tomoni ilgari surgan taklifni o‘ziga qarashli Kosmos kompaniyasi orqali Ispaniya sport federasiyasiga yetkazgan. To‘g‘ri, RFEF (Ispaniya Qirollik futbol federasiyasi) hammasi qonun doirasida amalga oshirilganini ta’kidladi va buni futbolchi ham tasdiqladi. Har holda, federasiya prezidenti Luis Rubialesning aytishicha, Pike vositachilik uchun komission haq olgan emas. Lekin Saudiya Arabistoni uning kompaniyasi hisob raqamiga 4 million yevro o‘tkazib bergan.
Jerar Pike bu boradagi ayblovlarni bir necha marta inkor etdi. U bot-bot o‘z ishida noqonuniy tomoni yo‘qligini ta’kidlamoqda: «Biz amalga oshirgan barcha harakatlar qonuniydir. Yuzimni boricha ko‘rsataman, chunki yashiradigan hech narsa yo‘q. Qisqasi, nimanidir yashirmayapman, aksincha, Kosmos vositasida qilgan ishimdan faxrlanaman». Biroq sport to‘g‘risidagi yangi qonun bo‘yicha amaldagi sportchining bunday kelishuvlarda ishtirok etishi taqiqlanadi. Oddiy aytganda, bu endi noqonuniy hisoblanadi. To‘g‘ri, ushbu qonun oldingi holatlarga qaratilmasligi tayin, shunday ekan, Pikega Ispaniya superkubogidagi vositachiligi uchun hech qanday tahdid yo‘q. Faqat uning familiyasi Ispaniya qonunchiligiga kirgani qoladi, xolos.
