O‘zbekiston terma jamoasi hujumchisi Eldor Shomurodov Qozog‘istonga qarshi bo‘lib o‘tgan o‘rtoqlik o‘yinidan so‘ng (2:0) o‘z fikrlari bilan o‘rtoqlashdi.

"Avvalo kun sovuq bo‘lishiga qaramay stadionga tashrif buyurgan muxlislarga rahmat aytaman. Bugun o‘ylagan barcha rejalarimiz amalga oshdi. Ayniqsa, birinchi bo‘limda 2ta gol urib oldik. Ikkinchi bo‘limda esa ko‘proq himoyaga e’tibor qaratib, gol o‘tkazib yubormaslikka harakat qildik. Hali kamchiliklarimiz bor. Buning ustida ishlaymiz. Qozog‘iston terma jamoasi ham yaxshi o‘yin namoyish etdi.

Terma jamoa eng yaxshi to‘purar bo‘lgan Maksim Shaskixning  rekordini takrorlashimga bir gol qoldi. Albatta, bu rekordni yangilashni istayman. Bu tarixda qoladigan fakt. Bu rekordni yangilab olsam, u yog‘i ruhiy jihatdan osonroq bo‘ladi, deb o‘ylayman.

Rossiyaga qarshi o‘yin yanada qiyinroq bo‘ladi. Chunki ular nafaqat jismoniy jihatdan balki, texnik va taktik jihatdan ham kuchli hisoblanadi. Ularga qarshi o‘rtoqlik o‘yinida ham o‘zimizni yaxshi jihatdan ko‘rsatishga intilamiz.

"Roma"dagi rejalar? Hozir terma jamoa safidaman. Shu bois, bu haqda keyinroq gaplashamiz", — dedi Shomurodov.