Ўзбекистон терма жамоаси ҳужумчиси Элдор Шомуродов Қозоғистонга қарши бўлиб ўтган ўртоқлик ўйинидан сўнг (2:0) ўз фикрлари билан ўртоқлашди.

"Аввало кун совуқ бўлишига қарамай стадионга ташриф буюрган мухлисларга раҳмат айтаман. Бугун ўйлаган барча режаларимиз амалга ошди. Айниқса, биринчи бўлимда 2та гол уриб олдик. Иккинчи бўлимда эса кўпроқ ҳимояга эътибор қаратиб, гол ўтказиб юбормасликка ҳаракат қилдик. Ҳали камчиликларимиз бор. Бунинг устида ишлаймиз. Қозоғистон терма жамоаси ҳам яхши ўйин намойиш этди.

Терма жамоа энг яхши тўпурар бўлган Максим Шацкихнинг  рекордини такрорлашимга бир гол қолди. Албатта, бу рекордни янгилашни истайман. Бу тарихда қоладиган факт. Бу рекордни янгилаб олсам, у ёғи руҳий жиҳатдан осонроқ бўлади, деб ўйлайман.

Россияга қарши ўйин янада қийинроқ бўлади. Чунки улар нафақат жисмоний жиҳатдан балки, техник ва тактик жиҳатдан ҳам кучли ҳисобланади. Уларга қарши ўртоқлик ўйинида ҳам ўзимизни яхши жиҳатдан кўрсатишга интиламиз.

"Рома"даги режалар? Ҳозир терма жамоа сафидаман. Шу боис, бу ҳақда кейинроқ гаплашамиз", — деди Шомуродов.