Франция терма жамоаси ярим ҳимоячиси Эдуардо Камавинга Бельгияга қарши ўйин ва рақиб дарвозасида Тибо Куртуа бўлмаслиги ҳақида фикр билдирди.
Бугун Бельгия терма жамоаси Миллатлар лигаси 2-турида Францияни қабул қилади.
— Бу ўйин доирасида ўзига хос рақобатни ҳис қиласизми ёки французлар учун бу аллақачон ўтмишда қолганми?
— (Кулади) Бу барибир муҳим ўйин, чунки Бельгия — катта футбол мамлакати. Аммо ўтмишдаги воқеаларни эсласак, менимча, аксинча, биз сиз бельгияликларнинг жонига текканмиз. Лекин бу ажойиб ўйин бўлади ва, албатта, барчамиз бундай учрашувларни интиқлик билан кутамиз.
— Ниҳоят дунёнинг энг яхши дарвозабони деб ҳисобланадиган футболчига қарши ўйнамаслигингиздан хурсандмисиз?
— Жуда хурсандман. Терма жамоага кетишимиздан олдин у билан гаплашгандик. Аммо саволингизга жавоб берсам, ҳа, унинг бу ерда йўқлигидан жуда мамнунман, — деди Камавинга табассум билан ўйинолди матбуот анжуманида.
