Joriy mavsum APLda ishlari sira yurishmayotgan «Everton» 16-turda yana bir og‘riqli mag‘lubiyatga yuz tutdi.

Liverpul klubi bu safar kamtarin «Born­mut» maydonida «tish»siz ko‘rindi va ortga 0:3 hisobi bilan qaytdi. Jamoa ortidan Bornmutga borgan liverpullik muxlislar esa final hushtagi chalinganidan so‘ng futbolchilardan mutlaqo norozi ekanliklarini ochiq-oydin namoyish etishdi.

«Everton» yetakchilaridan biri Aleks Ivobi muxlislarni tinchlantirish va umumiy vaziyatni yumshatishni o‘yladi, chog‘i, tribunaga yaqinlashib, egnidagi futbolkani yechdi va olomon o‘rtasiga tashladi. Biroq behuda. Aksincha, Ivobining bu xatti-harakati alamzada muxlislar g‘azabini yanada kuchaytirdi. Xullas, «Everton» yetakchisiga tegishli klub futbolkasiga hech kim qiyo boqqani yo‘q. Oradan hech qancha vaqt o‘tmay, g‘alaba, loaqal durang ilinjida klub ortidan safarga chiqqan muxlislar formani futbolchining o‘ziga qayta uloqtirishdi.

Ha, bugun «Everton» muxlislariga havas qilib bo‘lmaydi. Ayni holatda ularni bitta futbolka bilan tinchlantirishning iloji yo‘q. G‘alaba bo‘lsa, boshqa gap. Axir APL tarixida hali biror marta qo‘yi divizionga tushmagan jamoa hozir turnir jadvalining 17-qatorida turibdi. Eslatma, «Everton» o‘tgan mavsum elitada bir amallab ilinib qolgandi. Tabiiyki, muxlislar yana shunday bo‘lishini aslo xohlamaydilar.