Angliya FA bir kun kelib, bu futbolchilarni saqlab qola olmagani uchun afsus chekishi mumkin. Ayni damda Qatarda Jahon chempionati bo‘lib o‘tmoqda. U yerda asli Angliyada tug‘ilib o‘sgan, lekin boshqa yurt sharafini himoya qilayotgan futbolchilar bisyor. Quyida shu haqida gap boradi.
Jamal Musiala – Germaniya
Dunyodagi eng yaxshi yosh futbolchilardan biri bo‘lgan Musiala, hozirda Germaniya sharafini himoya qilmoqda. 19 yoshli futbolchi Germaniyada nigeriyalik ota va polyak ildiziga ega bo‘lgan onadan dunyoga keladi. 7 yoshidan boshlab Jamal Angliyada ulg‘ayadi. 8 yil davomida "Chelsi" akademiyasida bo‘lgan futbolchi, 2019 yilda "Bavariya"ga kelib qo‘shilgan. Musiala 15, 17, 21 yoshli Angliya termasida harakat qilgan. U 2021 yilning fevral oyida nemislar sharafini himoya qilishini bildirgandi.
Itan Ampadu – Uels
Ampadu Irlandiya, Angliya, Gana hamda Uels terma jamoasi sharafini himoya qilishi mumkin edi. U 16 yoshli bolalar tarkibida Angliya termasida debyut qilgan. Ammo, keyinchalik, "Chelsi" tarbiyalanuvchisi Uelsni tanlagan. U Jahon chempionatida AQSHga qarshi kechgan bahsda (1-1) to‘liq maydonda bo‘ldi.
Metti Kesh – Polsha
"Aston Villa" futbolchisi Angliyaning hech bir yosh toifasiga chaqiruv olmaydi. Shundan keyin, Kesh Polsha fuqaroligini qabul qiladi. Uning onasi polyak edi. O‘tgan yili u Polsha safida debyut qildi. 25 yoshli qanot himoyachisi Qatardagi turnirda asosiy jamoa safida harakat qilmoqda.
Brennan Jonson – Uels
Yana bir Angliya termasiga qabul qilinmagan futbolchilardan biri Jonsondir. "Nottingem Forest" a’zosi bu mavsum APLda porlamoqda. Uning otasi asli yamaykalik sanaladi. Shuning uchun Jonson Yamayka, Angliya va Uels termasida o‘ynashi mumkin edi. Ammo u "Ajdarlar"ni tanladi.
Jovanni Reyna – AQSH
Reyna Qo‘shma Shtatlar termasidagi yosh iste’dodlardan biri sanaladi. U "Reynjers", "Manchester Siti" hamda AQSH terma jamoasining sobiq vakili Klaudio Reynaning o‘g‘lidir. Uning oldida Portugaliya, Argentina va Angliyani tanlash imkoni bor edi. Ammo u o‘z vatani bo‘lmish Amerikani ma’qul ko‘rdi. 20 yoshli Reyna "Borussiya Dortmund"ning ishongan vakiliga aylandi.
Tariq Lempti
Angliya milliy terma jamoasi safiga kirmay qolgan ko‘plab futbolchilar ichida Lempti ham bor edi. Shu sababli, u o‘z otasi tug‘ilgan Gana sharafini himoya qilishga qaror qildi. Bu esa to‘g‘ri tanlov edi. "Brayton" himoyachisi yaqin o‘tmishda Angliyaning 17 va 21 yoshgacha bo‘lgan jamoasida harakat qilgan. U shu yil iyul oyida Gana termasini tanlagani haqida ma’lum qildi. U ilk bor 23 sentyabr kuni Gana safida debyut qilgan edi.
ISMATOV J.
