Luis Suares "Liverpul" futbol klubi tarixidagi eng yaxshi hujumchilardan biridir. Ammo uning omadli davrlari 2014 yildan keyin, futbolchi "Barselona"ga ko‘chib o‘tgach, sodir bo‘ladi. Uning mersisayddagi so‘nggi mavsumi 31 ta gol bilan yakunlanadi. Quyida u bilan 2014 yilning yozida sotib yuborilgan besh futbolchining taqdiri qanday kechganiga e’tibor qaratamiz.
Konor Koadi
Koadi o‘zi tarbiyalangan klubi tomonidan 500 ming funt evaziga "Xaddersfild"ga sotib yuboriladi. Kodi o‘zini bir yil o‘tgach, "Vulverxempton" safida ko‘rsata oldi. U jamoasini APLga olib chiqadi. Markaziy himoyachi o‘tgan mavsumda "Everton"ga ijaraga berib yuboriladi. Kodi Angliya terma jamoasiga chaqiruv oldi. Ammo mundialning guruh bahslarida qatnashmadi.
Pepe Reyna
Reyna "Enfild"ni muxlislarga sevimli bo‘lib tark etdi. Ispaniyalik darvozabon "Bavariya"ga yo‘l oladi. Undan keyin esa "Napoli"ga borib qo‘shiladi. Bu davr mobaynida Reyna Bundesliga chempioni bo‘ldi va Italiya kubogini qo‘lga kiritdi. Ayni damda qahramonimiz 40 yoshda va "Vilyarreal" sharafini himoya qilmoqda.
Martin Kelli
Kelli "Liverpul" safida atigi 5 ta bahsda maydonga tushgan. Ko‘p o‘tmay u "Kristal Pelas"ga sotib yuboriladi. Himoyachi londonliklar safida foydali o‘yinlar ko‘rsatdi va tarkibning barqaror a’zosiga aylandi. Ammo jarohatlar uning faoliyatiga soya soldi. Shu sababdan 32 yoshli futbolchi so‘nggi 2 mavsumda atigi 3 ta bahsda ishtirok etdi. Uning hozirgi taqdiri noma’lum.
Jek Robinson
"Liverpul" safida o‘yin o‘tkazgan ikkinchi eng yosh futbolchi Jek edi. U "Blekpul" va "Vulvz"da ijarada yurdi. Oradan bir yil o‘tib esa "QPR"ga sotib yuborildi. Uning APLga qaytishi 2019 yilda "Sheffild Yunayted" bilan yuz berdi. Ha, bu davr uzoqqa cho‘zilmadi. Ammo Robinson hali ham "tig‘chilar" sharafini himoya qilmoqda.
Daniel Agger
Reyna kabi Agger ham muxlislar ardog‘ida jamoani tark etadi. 8 yillik xizmatlaridan keyin daniyalik himoyachi o‘z ona yurtiga qaytadi. U yerda Agger "Brondbyu" sharafini himoya qila boshladi. Futbolchi "Liverpul" libosida 232 marta maydonda harakat qilgan. U jamoa bilan mamlakat kubogi va liga kubogini qo‘lga kiritgan. Ayni damda Agger murabbiylik faoliyati bilan shug‘ullanmoqda.
ISMATOV J.
