Fransiya terma jamoasi himoyachisi Rafael Varan jahon chempionati 1/8 finalida Polshaga (3:1) qarshi o‘yindagi tanaffus vaqtida jamoaloshlariga aytgan so‘zlari haqida gapirdi. Eslatib o‘tamiz, bu vaqtga kelib “uch ranglilar” 1:0 hisobida oldinda borayotgandi.
"Biz orzu bilan yashayapmiz, lekin agar biz xuddi shu ruhda davom etsak, bu orzu har qanday vaqtda barbod bo‘lishi mumkin", - dedi Varan GFFN bilan suhbatda.
So‘nggi o‘yindagi g‘alaba fransiyaliklarga jahon chempionatining chorak finaliga yo‘l olish imkonini berdi va u yerda 1/8 finalda Afrikaning amaldagi chempioni Senegalni ishonchli mag‘lub etgan (3:0) Angliya terma jamoasi bilan to‘qnash keladi. Ushbu o‘yin 11 dekabr kuni bo‘lib o‘tadi va u Toshkent vaqti bilan soat 00:00da boshlanadi.
