Italiyalik murabbiy Klaudio Ranyeri Jahon chempionati finali arafasida Fransiya terma jamoasi hujumchisi Kilian Mbappeni Argentina terma jamoasi yetakchisi Lionel Messi bilan solishtirdi.

Ranyerining fikricha, Mbappe texnikasi va tezligi bilan portugaliyalik hujumchi Krishtianu Ronalduga o‘xshab ketadi. Messi esa hech qachon hozirgidek qat’iyatli ko‘rinmagan.

"Messi maydonda yetakchilik qilishdan tashqari o‘zining xarizmasini ham ko‘rsatdi. U hamma narsani qanday qilishni biladi, hech kim ko‘rmaydigan shunday paslar bilan jamoadoshlarini topadi, g‘ayrioddiy gollar urishni biladi", - dedi Ranyeri La Gazzetta dello Sport bilan suhbatda.

Shu bilan birga, mutaxassis bo‘lajak final nafaqat Messi va Mbappe o‘rtasidagi qarama-qarshilik, balki ikki chinakam kuchli jamoa o‘rtasidagi o‘yin ekanligini ham ta’kidladi.

Argentina va Fransiya o‘yini 18 dekabr, yakshanba kuni bo‘lib o‘tadi. O‘yin Toshkent vaqti bilan soat 20:00 da boshlanadi.