Италиялик мураббий Клаудио Раньери Жаҳон чемпионати финали арафасида Франция терма жамоаси ҳужумчиси Килиан Мбаппени Аргентина терма жамоаси етакчиси Лионель Месси билан солиштирди.

Раньерининг фикрича, Мбаппе техникаси ва тезлиги билан португалиялик ҳужумчи Криштиану Роналдуга ўхшаб кетади. Месси эса ҳеч қачон ҳозиргидек қатъиятли кўринмаган.

"Месси майдонда етакчилик қилишдан ташқари ўзининг харизмасини ҳам кўрсатди. У ҳамма нарсани қандай қилишни билади, ҳеч ким кўрмайдиган шундай паслар билан жамоадошларини топади, ғайриоддий голлар уришни билади", - деди Раньери La Gazzetta dello Sport билан суҳбатда.

Шу билан бирга, мутахассис бўлажак финал нафақат Месси ва Мбаппе ўртасидаги қарама-қаршилик, балки икки чинакам кучли жамоа ўртасидаги ўйин эканлигини ҳам таъкидлади.

Аргентина ва Франция ўйини 18 декабрь, якшанба куни бўлиб ўтади. Ўйин Тошкент вақти билан соат 20:00 да бошланади.