Jahon chempionati futbolchilar uchun doimo ajoyib imkoniyat bo‘lgan. Negaki, aynan mundial orqali ko‘pchilik o‘ziga yangi klub topa oladi. Garchand bu galgi turnir qishda o‘tkazilgan bo‘lsada, transferlar oynasiga bu narsa ta’sir qilmaydi. Quyida Jahon chempionatida porlagan va katta klublarga o‘tishi kutilayotgan futbolchilar haqida so‘z boradi.
Kodi Gakpo – 23 yosh, "PSV" va Niderlandiya
Barcha guvohi bo‘lganidek, Gakponing gollari gollandlarga katta yordam bergandi. Guruh bosqichida yulduzga aylangan hujumchi Niderlandiyani birinchi o‘rin bilan keyingi bosqichga chiqishiga katta yordam berdi. Gakpo hozir mahalliy "PSV" klubi safida harakat qilmoqda. Ammo uning yo‘liga "MYU" ko‘z tikib turibdi. Ten Xag Ronaldu o‘rnini Gakpo bilan to‘ldirishni niyat qilgan.
Gansalu Ramush – 21 yosh, "Benfika" va Portugaliya
Ramush o‘zining ilk o‘yinida xet-trikka erishgandi. Ronaldu o‘rniga tushirilgan hujumchi borasida, o‘sha voqeadan keyin tranfser mish-mishlari ko‘payib ketdi. Ramush "Benfika" bilan bu mavsumda 14 ta gol va 6 ta assistga erishgan. U uchun "MYU" va "Bavariya" qiziqish bildirmoqda.
Yoshko Gvardiol – 20 yosh, "Leypsig" va Xorvatiya
Ha, u yozda "Chelsi"ga o‘tishi mumkin edi. Ammo londonliklar uning o‘rniga Vesli Fofanani tanlashdi. Gvardiolning narxi Qatardagi mundial sabab keskin ko‘tarilgan. Negaki, uning mehnatlari orqali Xorvatiya yarim finalga qadar yetib kela olgandi. Endilikda, 20 yoshli futbolchiga "Manchester Siti", "Real" va "Chelsi" da’vogarlik qiladi.
Yussufa Mukoko – 18 yosh, "BVB" va Germaniya
18 yosh bo‘lishiga qaramay, Mukoko Bundesliga yulduziga aylandi. Uning 11 goli, Xans Flikning Germaniya terma jamoasiga chaqirilishini ta’minlagan. Ha, Mukoko asosan zaxiradan maydonga tushirilgandi. Ammo uning xaridorlari hozirdan ko‘paya boshladi. Ro‘yxat boshida "Barselona" turibdi.
Enso Fernandes – 21 yosh, "Benfika" va Argentina
Markaziy yarim himoyachining Argentinadagi roli juda muhimdir. Uning ta’siri orqali terma jamoa finalga qadar yetib keldi. "Liverpul", "Manchester Siti", "MYU" va "Vulvz" yosh yulduzni o‘ziniki qilishni istovchilar orasida mavjud. Ammo "Benfika" Fernandes tovon pulini 104 million funt qilib belgilab qo‘ygan.
Dominik Livakovich – 27 yosh, "Dinamo Zagreb" va Xorvatiya
Avvaliga Livakovich Qatarga boradimi degan savol bor edi. Ammo hozir vaziyat butunlay o‘zgardi. Uning fantastik harakatlari bilan Marokash va Belgiya Xorvatiyaga gol ura olmadi. Yaponiya va Braziliyaga qarshi esa penaltilar seriyasida 4 ta seyvni amalga oshirdi. Hozirda Livakovichga "Lids", "Nottingem" va "MYU" qiziqa boshlagan.
ISMATOV J.
