Argentina terma jamoasi va “Aston Villa” darvozaboni Emiliano Martinesning agenti Gustavo Goni futbolchi faoliyatini Italiyada davom ettirishi mumkinligini tan oldi.
"Bugungi kunda kamdan-kam klublar Emiliano kabi darvozabonni qo‘lga kiritishga qodir, ammo A Seriya - nega bo‘lishi mumkin emas? Martines o‘z oldiga yuqori maqsadlar qo‘yadi, u Chempionlar ligasi uchun kurashmoqchi", - deya Goni so‘zlarini keltiradi Tuttomercatoweb.
30 yoshli Martines 2020 yil sentyabridan buyon “Aston Villa” safida to‘p suradi va joriy mavsumda chempionatda 24 ta o‘yinda 27 ta gol o‘tkazib yubordi va 8 ta o‘yinda o‘z darvozasi daxlsizligini saqlab qoldi.
2022 yilgi jahon chempionatida futbolchi Argentina terma jamoasi tarkibida jahon chempioniga aylandi. U jamoaning turnirdagi barcha yetti uchrashuvida qatnashib, 8 ta gol o‘tkazib yubordi va uchta o‘yinni "quruq" o‘tkazdi. Martines Qatardagi jahon chempionatining eng yaxshi darvozaboni deb topildi.
Transfermarkt.com portali darvozabonning narxini 25 million yevroga baholamoqda.
