Milanning «Inter» klubi himoyachi Matteo Darmian bilan yangi shartnoma borasidagi muzokaralarda muvaffaqiyatga erishdi. Sky Sport Italia xabariga ko‘ra, endi u bilan ikki yillik shartnoma imzolanishi realroq ko‘rinmoqda.
Eslatib o‘tamiz, Darmian «neradzurrilar» safida 2020 yildan buyon o‘ynab kelmoqda. Futbolchi jamoaga Antonio Konte boshchilik qilgan paytda kelib qo‘shilgan. Birinchi mavsumida Matteo «Inter» bilan A Seriyani, bir yildan so‘ng esa Italiya kubogini yutgan.
Joriy mavsumda italiyalik futbolchi chempionatning o‘nta o‘yinida ikkita golga assistentlik qildi. Avvalroq futbolchi A Seriyada «Palermo», «Torino» va «Parma» kabi klublar tarkibida ham to‘p tepgan.
