"Manchester Yunayted" Argentina va "Aston Villa" darvozaboni Emiliano Martinesga qiziqish bildirmoqda, deya xabar beradi Football Insider.

Manbaga ko‘ra, “qizil iblislar” shartnomasi 2023 yilning iyunida yakuniga yetadigan David de Xea o‘rniga uzoq muddatga o‘rinbosar qidirmoqda. 30 yoshli futbolchining "Aston Villa" bilan shartnomasi 2027 yilning iyuniga qadar tuzilgan.

Avvalroq, "Bavariya" jarohat olgan Manuel Noyerning o‘rniga Martinesni ko‘rib chiqayotgani xabar qilingandi.

Argentinalik futbolchi 2020 yil sentyabridan buyon “Aston Villa” safida to‘p suradi va joriy mavsumda jamoa safida 24 o‘yinda 27 ta gol o‘tkazib yubordi va 8 ta o‘yinda o‘z darvozasi daxlsizligini saqlab qoldi.

Qatardagi turnirda futbolchi Argentina terma jamoasi tarkibida jahon chempioni bo‘ldi. U jamoaning turnirdagi barcha 7 uchrashuvida qatnashib, 8 ta gol o‘tkazib yubordi. Martines Qatardagi jahon chempionatining eng yaxshi darvozaboni deb topildi.

Transfermarkt portali futbolchini 25 million yevroga baholamoqda.