2022 yilgi jahon chempionatidan keyin transfer bozorida ko‘plab mashhur ishsiz murabbiylar bor. Biz ularning yaqin kelajakda qayerda paydo bo‘lishi va murabbiylik faoliyatida qanday yutuqlarga erishganini ko‘rib chiqamiz.
Zinedin Zidan, 50 yosh, oxirgi ish joyi: “Real Madrid”
Fransiyalik butun murabbiylik faoliyatini "Real Madrid" tizimida o‘tkazdi. Asosiy tarkib bilan Zinedin Zidan ikki marta Ispaniya chempioni, Ispaniya Superkubogi g‘olibi, uch marta Chempionlar Ligasi, ikki marta UEFA Superkubogi va klublar o‘rtasidagi jahon chempionati g‘olibi bo‘ldi. Besh yil ichida murabbiy 11 ta sovrin to‘pladi va 2021 yilning yozidan beri ishlamayapti. Qatarda bo‘lib o‘tgan jahon chempionati vaqtida Zidan Fransiya terma jamoasi bosh murabbiyi sifatida Didye Desham o‘rnini egallashi mumkinligi haqida xabarlar tarqalgandi, ammo bu amalga oshmaydigan ko‘rinadi.
Fransiyaning ishonchli manbasi L'Equipe nashrining yozishicha, Zinedin Braziliya terma jamoasi bosh murabbiyligiga da’vogarlardan biri. Bundan tashqari, Zidan klub futbolida ish qidirmoqda. Qayd etilishicha, “Yuventus” uni o‘ziga jalb qilishi mumkin. Zidan 1996 yildan 2001 yilgacha Turinda futbolchi sifatida o‘ynagan. U "Yuve"ni boshqarishni istaydi, u yerda u keng vakolatlarga ega bo‘ladi, shuningdek, titullar uchun doimiy kurash olib boradi.
Tomas Tuxel, 49 yosh, oxirgi ish joyi: “Chelsi”
Nemis murabbiylik faoliyatini 27 yoshida boshlagan. Bir necha yilni “Shtutgart”, “Augsburg” va “Mayns” tuzilmalarida ishlashga bag‘ishlaganidan so‘ng, 2009 yilda Tomas Tuxel “Augsburg” asosiy jamoasini boshqargan. U klubda besh yil ishladi va shu vaqt ichida Bundesligada to‘qqizinchi, beshinchi, ikki marta 13 va yettinchi o‘rinlarni egalladi. 2016/2017 yilgi mavsumda Tomas Tuxel Dortmundning "Borussiya"si bilan o‘zining ilk sovrini - Germaniya kubogini qo‘lga kiritdi. Keyin uni "PSJ" va "Chelsi" bilan muvaffaqiyat kutayotgan edi - Fransiyada murabbiy oltita turli milliy sovrinlarni qo‘lga kiritdi. Londonliklar bilan esa Chempionlar ligasi, UEFA Superkubogi va klublar o‘rtasidagi jahon chempionatida g‘olib chiqdi.
So‘nggi ma’lumotlarga ko‘ra, Tomas Tuxel vizasi muddati tugagani sababli Angliyani tark etgan. Tomas "Real Madrid" bosh murabbiyi lavozimida Karlo Anchelottidan keyin kelishi mumkin bo‘lgan ro‘yxatda birinchi o‘rinda turadi. Bu haqda El Nacional xabar bermoqda.
Maurisio Pochettino, 50 yosh, oxirgi ish joyi: “PSJ”
Argentinalik 13 yillik murabbiylik faoliyati davomida “Espanyol”, “Sautgempton” “Tottenxem” va “PSJ” klublarida ishlagan. Maurisio Pochettino Fransiyadagi barcha sovrinlarini – chempionlik, kubok va superkubokni qo‘lga kiritdi. Mutaxassis "Tottenxem" bilan katta cho‘qqilarni zabt etdi, ammo sovrinlarsiz qoldi. Endilikda argentinalik murabbiy Braziliya va Angliya terma jamoalari bosh murabbiyi lavozimiga ko‘rib chiqilmoqda, deb yozadi The Guardian.
Luis Enrike, 52 yosh, oxirgi ish joyi: Ispaniya terma jamoasi
"Barselona"da ishlash - Enrike faoliyatidagi eng yaxshi bosqich. U ikki marta liga chempioni, uchta Qirol kubogi, Ispaniya Superkubogi, Chempionlar ligasi, UEFA Superkubogi va klublar o‘rtasidagi jahon chempionatida g‘olib chiqqan. Buning uchun Luis 2015 yilning eng yaxshi murabbiyi sovrini bilan taqdirlandi.
U "Roma", "Selta" va Ispaniya terma jamoasi bilan katta cho‘qqilarni zabt eta olmadi: terma jamoa bilan Enrike Yevro-2020da bronza medallarini qo‘lga kiritdi, 2020/2021 yilgi mavsumda Millatlar Ligasi finalida Fransiyaga yutqazdi. Muvaffaqiyatsizlikdan so‘ng, murabbiy hozirda hech qanday taklif yo‘qligini aytdi. Globo Esporte xabariga ko‘ra, Luis Enrike Braziliya terma jamoasi bosh murabbiyi lavozimiga ko‘rib chiqilmoqda.
Roberto Martines, 49 yosh, oxirgi ish joyi: Belgiya terma jamoasi
Uning Belgiya terma jamoasidagi yetti yilini omadsiz deb hisoblash mumkin. Uning rahbarligida terma jamoa kuchli tarkib va FIFA reytingida barqaror birinchi o‘rinni egallab turganiga qaramay, JCH-2018da faqat bronza medallarini qo‘lga kiritdi. Roberto Martines Belgiya terma jamoasiga kelishidan oldin “Everton”, “Uigan” va “Suonsi” klublarini boshqargan.
Oxirgi ikki klub bilan mos ravishda Angliya kubogi sohibi va championship g‘olibiga aylandi. Shunga qaramay, ispaniyalik murabbiyga qiziqish bor. Martines Meksika terma jamoasi bosh murabbiyi lavozimiga ustuvor variant hisoblanadi.
