"Tottenxem" klubi darvozaboni Ugo Lyoris Argentina terma jamoasi posboni Emiliano Martinesni JCH-2022'dagi harakatlari uchun tanqid qildi.

"Umuman olganda, faoliyatim davomida penaltilar seriyasida muvaffaqiyatli harakat qila olmaganman. Shunga qaramay, muhim penaltilarni qaytarganman. Penaltilar seriyasining ba’zilarida g‘alaba qozonganman, ammo ko‘pida yutqazganman. Bu jihatdan muvaffaqiyatli bo‘lgan darvozabonlar bor.

Ba’zi narsalarni men bajara olmayman. Masalan, darvozada turganimda ahmoqona harakatlar qilmayman. Bunday ishlar orqali raqibni ruhiy muvozanatdan chiqarishga urinmayman. Haddan tashqari mag‘lub bo‘lishni istamasam ham bunday ishlar qo‘limdan kelmayman...

Argentina terma jamoasi safida zarba beradigan futbolchilarni tahlil qilishim mumkin edi. So‘nggi 50ta penaltilarni ko‘rib chiqib, darvozaning chap va o‘ng burchaklari  hamda markaz bo‘ylab zarba beradigan o‘yinchilarni o‘rganib chiqishim mumkin edi. Ammo boshqa jihatlar ham bor. Ko‘pgina argentinalik futbolchilar o‘z klublarida penalti tepadi. Bizda esa, Kilian Mbappeni hisobga olmaganda, bunday emas. Masalan, Dibala va Lautaro Martinesni ko‘rganingda, buning sababini tushunasan. Dibala hech qachon markaz bo‘ylab zarba bermagan. Bu safar esa markazdan tepdi va to‘p shundoqqina oyoqlarim oldidan o‘tib ketdi.

Argentinani g‘alaba bilan tabriklashimiz kerak. Bunda esa Emiliano hal qiluvchi rolni o‘ynadi. Uning g‘alabani nishonlashi esa yetarlicha muhokama qilindi. Bu borada qo‘shimcha qilishim shart emas. Penaltilar seriyasida paytida bizning futbolchilarni muvozanatdan chiqarish uchun u qo‘lidan kelgan barcha ishni qildi.

Men jamoamning g‘alaba qozonishi uchun harakat qilaman. Ammo o‘zimni bunday tuta olmayman. Qo‘limdan kelmaydi", – dedi Lyoris "L’Équipe"ga bergan intervyusida.