Xabaringiz bor, "Neftchi" futbol klubi Turkiyada o‘quv-yig‘in mashg‘ulotlarini olib bormoqda. Iqtidorli hujumchi va OTJ a’zosi Ulug‘bek Hoshimov ham jamoa bilan birga yangi mavsumga tayyorgarlik ko‘rmoqda. Klub matbuot xizmati Turkiyadagi jarayon va o‘tgan mavsum yakunlari bo‘yicha Ulug‘bek Hoshimov bilan intervyu tashkilladi, uni e’tiboringizga havola qilamiz.
-Ulug‘bek yangi mavsumga tayyorgarlik qanday kechmoqda?
-Tayyorgarlik rejasiga asosan hozirgi kunda Antaliyada mashg‘ulotlar olib bormoqdamiz. Yangi mavsum uchun taassurotlar ijobiy. Mashg‘ulotlar ko‘ngildagidek o‘tmoqda.
-YAngi mavsumda ham jamoa safida to‘p suradigan bo‘ldingiz? Klubda qolishga ko‘proq nima turtki bo‘ldi?
-“Neftchi” jamoasi bilan ikki yildan buyon birgamiz. Avvalambor, klubda qolishga Vitaliy Levchenkoning ishonchi omil bo‘ldi. Bundan tashqari, klubda ichki muhit a’lo darajada. Shularni inobatga olib klubda qolishga qaror qildim.
-YAngi mavsumda hujum chizig‘ida yaxshigina raqobat ko‘rishimiz mumkin? Raqobatdan cho‘chimaysizmi?
- "Raqobat bor joyda o‘sish bo‘ladi”, deb bejiz aytishmagan. Raqobatdan qo‘rqmayman, “Ohirini o‘ylagan qahramon bo‘lolmaydi” (Kuladi)
-Raqobat ko‘proq qaysi futbolchilar bilan bo‘ladi deb o‘ylaysiz?
-Hujum chizig‘i va qanot vingerlari barchasi raqobat qila oladi, deb o‘ylayman.
-Sizga sof markaziy hujumchi rolida o‘ynash qulaymi yoki qanot vingeri ampluasi qulaymi?
-O‘zimni har ikki pozisiyada ham yaxshi his qila olaman. Asosiysi, murabbiy qaysi pozisiyaga qo‘ysa o‘sha chiziqda murabbiyning ko‘rsatmalarini bajara olaman.
-O‘tgan mavsumda jamoa ishtirokida siz uchun eng yorqin o‘yin qaysinisi bo‘ldi?
-"Istiqlol"da o‘tgan AGMKga qarshi bahs juda yorqin o‘tgandi. To‘g‘ri, o‘shanda mag‘lubiyatga uchragan edik. Biroq, uchrashuvda ochiq futbol namoyish etib, taktik jihatdan ustunlikka erishganmiz.
-YAngi mavsumda Ulug‘bek Hoshimovni “99” raqam ostida ko‘ramizmi?
-Ha, “99” raqamda harakat qilaman.
-YAngi mavsum oldidan muxlislar jamoadan yuqori saviyali futbol va katta g‘alabalarni kutishmoqda?
-Xudo xohlasa, bu yil natijalarimiz ancha yaxshi bo‘ladi. Muxlislarimizdan “Neftchi” jamoasiga doimiy ishqibozlik qilishlarini so‘rab qolaman. Stadionlarni to‘ldirib, qo‘llab turishsa biz albatta muxlislarimizni g‘alabalar bilan xursand qilamiz.
