Myunxenning «Bavariya» klubi boshqaruv raisi Oliver Kan Myonxengladbaxning «Borussiya» klubi darvozaboni Yan Zommerning transferi borasidagi muzokaralar haqida gapirdi. Klub avvalroq futbolchi uchun 9 million yevro taklif qilgan «Bavariya» taklifini rad etgandi.
«Klublar ushbu transferni muhokama qilishda davom etmoqda. Zommer bo‘yicha muzokaralar yakuniy bosqichda deb ayta olmayman. Biz boshqa variantlarni ham ko‘rib chiqamiz. Kevin Trapp? Birorta ismni keltirishning ma’nosi yo‘q», - deydi Kan.
Eslatib o‘tamiz, «Bavariya» mutasaddilari jarohati tufayli 2022/23 yilgi mavsumning qolgan qismini o‘tkazib yuboradigan darvozabon Manuel Noyerga o‘rinbosar qidirmoqda.
Joriy mavsumda Zommer «Borussiya» safida 15 ta uchrashuvda 19 ta gol o‘tkazib yubordi va 4 ta bahsda o‘z darvozasi dahlsizligini saqlab qoldi.
