"Arsenal" bir necha soatlardan keyin APL doirasida "MYU"ni qabul qiladi. Shu fursatdan foydalanib, bugun maydonda harakat qila oladigan futbolchilardan tuzilgan aralash tarkib tuzib chiqdik. Quyida shu haqida qisqacha so‘z boradi.
Darvozabon: Aron Ramzdeyl
"Arsenal" posboni David De Xeaning yaxshi formasiga qaramasdan, undan oldinda e’tirof etildi. Ramzdeyl o‘tgan mavsumda ajoyib debyut qilgandi. 2022-23 da esa fantastik ravishda ishtirok etmoqda. Uning Shimoliy London derbisidagi super qahramonligi ham uning Mikel Arteta qo‘l-ostida qanchalik yuksalganini ko‘rsatib beradi. Angliya terma jamoasi oyoq bilan o‘ynashda ham juda yaxshi sifatlarga ega. De Xea borasida esa bunday deya olmaymiz.
O‘ng qanot himoya: Ben Uayt
Shubhasiz, bu mavsumning APLdagi eng yaxshi qanot himoyachilaridan biri. U bilan birga Kiran Trippyerni ham aytish kerak. Ha, "MYU"da Diyegu Dalot ham bor. Ammo u Uaytchalik sifatli futbol ko‘rsata olmaydi. Ayniqsa, bu mavsumda.
Chap qanot himoya: Oleksandr Zinchenko
Bu ro‘yxatdagi eng murakkab tanlovlardan biri bo‘ldi. Lyuk Shou aslida ma’qulroq variant edi. Ammo uning barqarorligi so‘roq ostida. Bir mavsumda zo‘r bo‘lsa, ikkinchisida unday bo‘lmaydi. Zinchenko esa yangi mavsumda "Arsenal"ga keldi va qiynalmay moslashdi. Qolaversa, uning Arteta jamoasiga ta’siri ham kuchli. Shu omillar ukrainalikni tanlashga majbur qildi.
Markaziy himoya: Rafael Varan
Varan va Saliba orasidagi farqni ularninh Fransiya terma jamoasidagi o‘rni belgilab beradi. Ha, bu mavsumda ularning ikkisi ham fantastik o‘yin ko‘rsatmoqda. Ammo Varanning tajribasi va qobiliyati yaxshiroq. Ten Xagning jamoasida Varanning o‘rni juda ham katta.
Markaziy himoya: Gabriel
Lisandro Martines "MYU"ga kelgandan beri ajoyib saviya namoyish etdi. Garchand uning bo‘yi pastroq bo‘lsada, bu deyarli muammo bo‘lmadi. Biroq, barqarorlik masalasi ham mavjud. Gabriel bu borada istalgan futbolchiga o‘rnak bo‘la oladi. U APLdagi eng yaxshi to‘purar himoyachilardan biridir.
Tayanch yarim himoyasi: Tomas Parti
Kazemiro bugungi o‘yinda bo‘lmaydi. Shunday ekan, bemalol Tomas Partini tanlash mumkin. Gana terma jamoasi a’zosi fantastik mavsum o‘tkazmoqda. Uning ta’sirida "to‘pchilar" barqaror o‘yin ko‘rsatadi. Agarda u jarohat olsa, "Manchester Siti" "Arsenal"dan o‘zib ketishi hech gap emas.
Yarim himoyachi: Brunu Fernandesh
Fernandesh Kazemironing yo‘qligidan foydalanib, bu jamoaga kira oldi. Portugaliyalik APL tarixidagi eng yaxshi qishki transfer sanaladi. U Maguayr yo‘qligida sardorlik bog‘ichini taqadi. Amalda esa haqiqiy lider ham udir. Uning harakatlari bilan "MYU" hozirgi pog‘onasiga erishib turibdi.
Yarim himoyachi: Martin Edegor
Bu mavsumdagi eng yaxshi futbolchilar ichida Edegor ham bor. Uning maydondagi harakatlarini ko‘rish istalgan muxlisga zavq bag‘ishlaydi. Erling Xolandni ham fantastik o‘yin ko‘rsatayotganini hisobga olsak, Yevro-2024da Norvegiya nimadir qilishiga ishonish mumkin.
O‘ng qanot hujum: Bukayo Saka
Yana bir "Arsenal" yulduzi kosmik yorqinlikdagi mavsumni o‘tkazmoqda. Qayd etish kerakki, Saka Mikel Artetaning ilk kunlaridan beri tarkibdagi muhim figura bo‘lib kelmoqda. Angliya terma jamoasida ham mundial davomida aynan Saka porlay oldi.
Chap qanot hujum: Gabriel Martinelli
Aytish mumkinki, eng xavfli futbolchi APLda allaqachon paydo bo‘lgan. Uning ismi Martinelli. Istalgan raqib Martinelli borligi sababli "Arsenal" bilan ehtiyot bo‘lib o‘ynay boshladi. U birinchi davrada "MYU" gol urgandi. Ammo hakamlarning VAR'dagi xatosi sababli bu gol bekor qilingan. Martinelli esa bu bilan to‘xtab qolmadi. Uning o‘yini Braziliya terma jamoasiga chaqiruv bilan yakun topdi.
Markaziy hujumchi: Markus Reshford
Gabriel Jezus hozir maydonda emas. Shu sababli Reshfordni tanlaymiz. Ammo u Jahon chempionatidan keyin katta kuch bilan ishga kirishdi. "MYU"ning g‘alabalarida uning hissasi juda ham katta edi.
Bosh murabbiy: Mikel Arteta
Ten Xag "MYU"ni o‘ta tez ravishda o‘ngladi. Ammo Mikel Arteta bu ishni bir necha yildan buyon, tizimli ravishda amalga oshirmoqda. Saka, Martinelli, Jaka kabi futbolchilar Arteta bilan katta o‘sishga erisha oldi. Shu sabab hozirda aytish mumkinki, muxlislar rivojlanishga ishona boshladi! (Trust The Process)
ISMATOV J.
