RFIning OFKga o‘tkazilishi mumkinligi haqida Xalqaro Olimpiya qo‘mitasi kecha o‘z veb-saytida bayonot berdi. U yerda, xususan, Rossiya va Belarusga qarshi joriy qilingan sanksiyalarga to‘xtalishdi, ya’ni bu davlatlar hududida xalqaro musobaqalar o‘tkazilmasligi aytiladi.
Agar Rossiya terma jamoasi JCH-2026 uchun Osiyo qit’asi saralash turnirida ishtirok etsa va XOQ sanksiyalari bekor qilinmasa, rossiyaliklar mamlakatda uy uchrashuvlarini o‘tkaza olmaydi. Nazariy jihatdan bu omil OFK a’zolarining ovoz berishiga ijobiy ta’sir ko‘rsatishi mumkin. Haqiqatan ham, bu holatda Osiyo jamoalari Moskva yoki Sankt-Peterburgga uchishlari shart emas. Agar RFI uy stadioni sifatida Toshkent, Dushanbe yoki Bishkekdagi arenani (yoki Dubaydami?) tanlasa, Osiyo jamoalarining safari unchalik uzoq bo‘lmaydi.
Shuningdek, ba’zi rus manbalariga ko‘ra, RFI go‘yoki UYEFAdan chiqmasdan Osiyo orqali jahon chempionati saralash turnirida ishtirok etish variantini ko‘rib chiqmoqda. Tarixda bunday holat bo‘lmagan, bunday holat FIFA va OFK Nizomida ko‘zda tutilmagan va bu qaror qanchalik real ekanligi aniq emas.
Isroil tajribasda shunga o‘xshash holat mavjud. Isroil futbol assosiasiyasi 1974 yilda OFKdan chiqarib yuborilgan va 1994 yilgacha UYEFAga a’zo bo‘lolmagan, bunga qadar hech qanday konfederasiyaga a’zo bo‘lmagani diqqatga molik. O‘tgan yillar davomida Isroil terma jamoasi Yevropa, Okeaniya va Janubiy Amerikadagi saralash turnirlarida ishtirok etgan. Lekin asosiy farq shundaki, mamlakat futbol assosiasiyasi hech qanday konfederasiyaga a’zo bo‘lmagan. Agar RFI haqiqatan ham UYEFAdan chiqmasdan turib Osiyoda o‘ynashni istasa, bu futbol uchun yangilik bo‘ladi.
