РФИнинг ОФКга ўтказилиши мумкинлиги ҳақида Халқаро Олимпия қўмитаси кеча ўз веб-сайтида баёнот берди. У ерда, хусусан, Россия ва Беларусга қарши жорий қилинган санкцияларга тўхталишди, яъни бу давлатлар ҳудудида халқаро мусобақалар ўтказилмаслиги айтилади.

Агар Россия терма жамоаси ЖЧ-2026 учун Осиё қитъаси саралаш турнирида иштирок этса ва ХОҚ санкциялари бекор қилинмаса, россияликлар мамлакатда уй учрашувларини ўтказа олмайди. Назарий жиҳатдан бу омил ОФК аъзоларининг овоз беришига ижобий таъсир кўрсатиши мумкин. Ҳақиқатан ҳам, бу ҳолатда Осиё жамоалари Москва ёки Санкт-Петербургга учишлари шарт эмас. Агар РФИ уй стадиони сифатида Тошкент, Душанбе ёки Бишкекдаги аренани (ёки Дубайдами?) танласа, Осиё жамоаларининг сафари унчалик узоқ бўлмайди.

Шунингдек, баъзи рус манбаларига кўра, РФИ гўёки УЕФАдан чиқмасдан Осиё орқали жаҳон чемпионати саралаш турнирида иштирок этиш вариантини кўриб чиқмоқда. Тарихда бундай ҳолат бўлмаган, бундай ҳолат ФИФА ва ОФК Низомида кўзда тутилмаган ва бу қарор қанчалик реал эканлиги аниқ эмас.

Исроил тажрибасда шунга ўхшаш ҳолат мавжуд. Исроил футбол ассоциацияси 1974 йилда ОФКдан чиқариб юборилган ва 1994 йилгача УЕФАга аъзо бўлолмаган, бунга қадар ҳеч қандай конфедерацияга аъзо бўлмагани диққатга молик. Ўтган йиллар давомида Исроил терма жамоаси Европа, Океания ва Жанубий Америкадаги саралаш турнирларида иштирок этган. Лекин асосий фарқ шундаки, мамлакат футбол ассоциацияси ҳеч қандай конфедерацияга аъзо бўлмаган. Агар РФИ ҳақиқатан ҳам УЕФАдан чиқмасдан туриб Осиёда ўйнашни истаса, бу футбол учун янгилик бўлади.