"Liverpul"ning sobiq futbolchisi va "Sky Sports" muxbiri Jeymi Karrager Erling Xoland haqida o‘z fikrlarini bildirib o‘tdi. Unga ko‘ra Xoland "Manchester Siti"ni tanlab, "katta xato"ga yo‘l qo‘ygan.
22 yoshli hujumchi o‘tgan yozda 51 million funt evaziga "Borussiya Dortmund"dan olib kelingandi. Norvegiyalik futbolchi hozirga qadar 25 ta golga mualliflik qilishga ulgurdi. APLdagi yana 6 ta gol, Xolandni Yevropa tarixidagi eng sermahsul futbolchiga aylantiradi. Erling, shuningdek, mavsum davomida 4 ta xet-trik qayd etdi.
Shunga qaramay, ayrimlar Xolandni "Manchester Siti"ning ӯyin kartinasini yomonlashtirganda ayblamoqda. Pep Gvardiola shogirdlari chempionlik uchun kurashda "Arsenal"ga imkoniyatni boy bermoqda. "Shaharliklar" kecha "Tottenxem"ga mag‘lub bo‘lib, chempionlik poygasidagi imkoniyatlarini yomonlashtirgandi. Ushbu o‘yinda Erling Xoland juda ham yomon harakat qildi. U raqib darvozasiga birorta aniq zarba bera olmay, maydonni tark etishga majbur bo‘lgan. Shundan keyin, 22 yoshli hujumchi yana tanqidlarga uchradi. Jeymi Karrager Xoland tanqidchilari ichida bor edi. U shunday deydi:
"Menimcha, u "Manchester Siti"ga o‘tib katta xatoga yo‘l qo‘ygan. Bu jamoa Xolandning bor imkoniyatlarini ochib bera olmaydi. Bugungi o‘yin bunga yaqqol isbot bo‘la oladi. Masalan, "Manchester Siti"ning qolgan futbolchilari bu mavsumda Xoland urgan gollarga teng golni urgan. Ammo ayni paytda, bu klub har yilgidan ko‘proq gol o‘tkaza boshladi. Gvardiola jamoasi bilan qarshi hujumda o‘ynash osonroq bo‘lib qoldi.
"Manchester Siti" tengma-teng futbolga o‘rganmagan. Bu jamoa o‘zi kabi hujumkor o‘ynaydigan jamoa qarshisida zaif ko‘rinadi. Chunki Gvardiola shogirdlarini faqat hujumga o‘rgatadi. Erling Xoland hozir 25 ta gol urishga ulgurdi. Lekin menimcha, bu futbolchining bor kuchini hali ko‘rishga ulgurmadik. Men futbolchini bunda ayblamayman. 25 ta gol ham katta natija. Ammo, menga Xoland faqat 60-70 foiz kuchinigina ko‘rsatayotgandek tuyuladi. Muxlislar Xolandning nimalarga qodir ekanini hali yaxshi bilmaydi. Bu uchun u "Manchester Siti"dan boshqa jamoada bo‘lishi kerak. Istaysizmi yo‘qmi, Xoland nechta gol ursa ham, uning qolgan jamoadoshlari qo‘shilishib, shuncha gol urmoqda. Bu esa yaxshi signal emas. Bu butun bir jamoa Xolandga bog‘lanib qolayotganini anglatadi".
ISMATOV J.
