"Liverpul" yozgi transfer oynasida himoyachi Joel Matip bo‘yicha takliflarni tinglashga tayyor, deb xabar beradi Football Insider.

Nashrning yozishicha, ingliz klubi rahbariyati futbolchining o‘yin sifati keskin tushib ketganidan norozi, biroq himoyachilarning jarohatlari ko‘p bo‘lgani uchun ular himoya markazini 31-yoshli kamerunlik o‘yinchiga ishonishga majbur.

Angliya Premyer-ligasining 22-turidan o‘rin olgan “Vulverxempton”ga qarshi o‘yinda (0:3) Matip avtogol muallifiga aylandi. Himoya yetakchisi Virjil van Deyk jarohati sabab bu uchrashuvda ishtirok etmadi.

Kamerunlik himoyachi 2016 yilning yozidan buyon "Liverpul" safida to‘p suradi. Uning amaldagi shartnomasi 2024 yilgacha mo‘ljallangan.

Joriy mavsumda u Angliya jamoasi safida barcha musobaqalarda 15 ta o‘yin o‘tkazib, 1 ta gol urishga muvaffaq bo‘ldi. Transfermarkt ma’lumotlariga ko‘ra, futbolchining narxi 16 million yevroni tashkil qiladi.

"Qizillar" 20 o‘yindan keyin 29 ochko bilan APLda 10-o‘rinda bormoqda.