Bugun OʻFAda Yaponiyaning futbol assotsiatsiyasi Xirosima boʻlinmasi vakillari Tomohito Xirasava va Yutaka Ide ishtirokida uchrashuv boʻlib oʻtdi. Uchrashuv avvalida OʻFA birinchi vitse-prezidenti Ravshan Irmatov soʻnggi yillarda ikki mamlakat oʻrtasida futbolni rivojlantirish borasidagi harakatlar yangi bosqichga chiqqanligini eʼtirof etdi. Xususan, 2022-yil Yaponiyada boʻlib bir nechta xalqaro musobaqalarda turli yoshdagi terma jamoalarimiz ishtirok etib, sovrinli oʻrinlarga ega chiqqanligi, yurtimizda oʻtkazilgan turnirlarda esa yaponiyalik futbolchilar doimiy ravishda ishtirok etib kelayotgani qayd etildi. Shuningdek, yurtimizda yaponiyalik mutaxassislar faoliyat olib borayotgani eʼtiborga loyiq.

Kun tartibiga koʻra, tomonlar turli jamoalar oʻrtasida oʻrtoqlik uchrashuvlarini tashkillashtirish, Yaponiyada oʻtkaziladigan xalqaro turnirga Oʻzbekiston terma jamoalarini jalb etish yuzasidan oʻzaro fikr almashdilar.

Yaponiyalik mutasaddilar Oʻzbekiston bilan ikki tomonlama doʻstlik va hamkorlik aloqalaridan mamnun ekanligini aytib, yangi istiqbolli loyihalarni birgalikda amalga oshirishga tayyorligini bildirdilar.