APLda hammasi qiziqarli tus olib bormoqda. Barchasi so‘nggi turlargacha hal bo‘lmasligidan, albatta muxlislar yutadi. Bӯ yerda nafaqat chempionlik yoki to‘rtlikka kirish uchun, balki turnirda qolish uchun ham qizg‘in kurashlar kechadi.
Angliyada so‘nggi tur bahslari ham juda qiziq tus oldi. Xususan, "Arsenal" "Lester"ni mehmonda kichik hisobda yengib, o‘z yetakchiligini mustahkamlagan bo‘lsa, ortidan "shaharliklar" "Bornmut"ni yer tishlatdi.
Boshqa frontlarda ham kurashlar avjida. Masalan, "Tottenxem" "Nyukasl"ning kubok bahsidagi ishtirokidan foydalangan holda, to‘rtinchi o‘ringa 4 ochkolik farq bilan joylashib oldi. "Shporlar" o‘z uyida "Chelsi"ni 2-0 hisobida mag‘lub etgan edi. "Fulxem" va "Liverpul" ochko yo‘qotgani ham e’tiborga molik faktlardir. Pastki tomonlarda ham janglar kechmoqda. Xususan, "Vest Xem" o‘z maydonida "Nottingem"ni 4-0 hisobida yengib, xavfli hududdan tepaga ko‘tarilib oldi. "Everton" esa "Aston Villa"ga uchralgan mag‘lubiyat sababli yana "kuchsiz uchtalik"ka qaytishga majbur bo‘ldi. Xo‘sh, shunday natijalardan so‘ng, APLda kim chempion bo‘ladi? Superkompyuter buni yana bir bor taxmin qilib ko‘rdi.
Hisob-kitoblarga ko‘ra, "Arsenal" 38-turga qadar yetakchilik maqomini saqlab qoladi. Mikel Arteta jamoasi so‘nggi 19 yildagi ilk chempionlikka erishishi taxmin qilingan. Ular "Manchester Siti"dan 4 ochko odimlab ketgan holda mavsumni yakunlaydi.
Ulardan sal pastroqda to‘rtinchi o‘rin uchun kurash kechadi. Unda "Tottenxem" va "Nyukasl" poygaga kirishadi. Superkompyuterga ko‘ra, "qarg‘alar" hisobida ikkita zaxiradagi o‘yin borligi, mavsum so‘ngidagi jadvalga ta’sir etadi. Natijada Eddi Xau shogirdlari "Tottenxem"ni bir ochko farq bilan ortda qoldirib, to‘rtinchi o‘ringa ega chiqadi.
Jadval pastida ham zichlik mavsum oxiriga qadar saqlanib qoladi. Jumladan, 38-turdan keyin 12 va 19 o‘rindagi jamoalar o‘rtasidagi farq, bor-yo‘g‘i olti ochkoni tashkil etadi. Bu esa har qaysi uchta jamoa Chempionshipga ravona bo‘lishi mumkinligini angalatadi. Superkompyuter esa o‘sha uchta nomzodlar o‘rnida "Bornmut", "Sautgempton" va "Everton" bo‘lishini taxmin qilgan. Boshqa nomzodlar bo‘lmish "Vulverxemoton", "Nottingem" va "Lids"lar turnirda jon saqlab qoladi.
ISMATOV J.
