Roberto Firmino yozda «Liverpul»ni tark etadi. 31 yoshli braziliyalikning shartnomasi mavsum oxirida tugaydi va tomonlar yangi shartnoma imzolashmaydi. «Enfild» «qizillar»ning haqiqiy afsonasini qoldirmoqchi — «Liverpul»da sakkiz yil davomida o‘ynagan Bobbi, muxlislari uni shunday atashadi, Roberto bunday maqomga to‘liq loyiq. Mubolag‘asiz, Sadio Mane - Firmino - Salohdan iborat ajoyib hujum triosi bitta misrlik bilan qoladigan bo‘ldi.

Braziliyalik futbolchi «Enfild»ga Yurgen Kloppdan bir necha oy oldin yetib keldi. Uni nemisning o‘tmishdoshi Brendan Rojers sotib olgan. Bobbi o‘ynagan «Xoffenxaym» 2015 yilning yozida 41 million yevro miqdorida katta daromad oldi, ammo bu kelishuv to‘liq o‘zini oqladi. «Liverpul» libosida barcha musobaqalarda u 353 ta o‘yin, 107 ta gol va 71 ta golli uzatmani amalga oshirdi, ammo Firminoning jamoa uchun qadrini raqamlar bilan o‘lchab bo‘lmaydi.

Aytish mumkinki, braziliyalik hujumchi Yevropaning mashhur klublarida o‘ynaganlar orasida so‘nggi o‘n yillikdagi eng past baholangan futbolchidir. Albatta, eng kam baholanganlardan biri desa ham bo‘ladi. Saloh haqiqiy gol mashinasi edi, Mane vaqti-vaqti bilan katta sahnaga chiqardi, ammo Firminosiz bularning hech biri sodir bo‘lmasdi. O‘zining eng yaxshi formasida bo‘shliqni mukammal his qilgan Bobbi ajoyib futbol zakovati bilan daholigini isbotladi. Klopp Firminoni jamoaning dvigateli deb atadi. 

Hozir bu kulgili tuyuladi, ammo 2015 yilning yozida Rodjers - «qizillar»ning o‘sha paytdagi xo‘jayini - Firminoni sotib olishni chindan ham xohlamadi. O‘shanda «Aston Villa» vakili belgiyalik Kristian Benteke hujumni kuchaytirish uchun ideal variantdek tuyuldi. Oxir-oqibat, ikkalasi ham olindi. Braziliyalik futbolchi «Enfild» afsonasiga aylandi, Benteke esa «Kristal Pelas»ga yo‘l oldi.

«Shubhasiz, Bobbi faoliyatini yakunlagach, odamlar uning to‘qqizlik pozisiyasi haqida kitoblar yozishadi. Men buni u ixtiro qilgan deb aytmayapman, lekin Bobbining o‘ynash usuli yagona», - degandi Klopp o‘tgan mavsumda «Manchester Yunayted»ni mag‘lub etganidan keyin (5:0) braziliyalik futbolchiga qoyil qolgan holda.

Bu Firminoning so‘nggi ikki yildagi eng yaxshi o‘yinlaridan biri bo‘lib, mushaklardagi jarohatlar bilan kechgan. U o‘tgan mavsumda besh xil jarohat oldi va barcha musobaqalarda jami 26 ta o‘yinni o‘tkazib yubordi. «Liverpul» to‘rtta sovrin uchun kurashib, oxir-oqibat ikkita kubokni qo‘lga kiritgan paytlarni braziliyalik futbolchi asosan chetdan kuzatdi. Taqqoslash uchun, 2016 va 2021 yillar oralig‘ida Kloppning «Liverpul»dagi dastlabki beshta to‘liq mavsumida u Premyer-liganing 10 ta o‘yinini o‘tkazib yuborgan edi xolos. Sentyabr oyida klub va futbolchi yangi shartnoma bo‘yicha muzokaralarni boshlab yubordi, ammo yakunda Firmino hech narsa imzolamaslikka qaror qildi. The Athletic xabariga ko‘ra, hujumchi shunchaki muhitni o‘zgartirish niyatida va yangi sinovlarni ko‘rmoqchi.

«Men uning qolishini xohlayman. Bobbi bu yerda nima bo‘layotganini va u haqida nima deb o‘ylayotganimizni biladi. Mavsumning birinchi qismini ajoyib o‘tkazmadik, biroq Bobbi yaxshi o‘ynagan yagona odam edi. U biz uchun juda muhim, u qiyin vaziyatlarda asosiy bo‘g‘in bo‘lib beradi. Uning futbol zakovati bilan biz o‘z o‘yinimizni qurishda davom etishimiz mumkin», - dedi Klopp yanvar oyida, Firmino hali ham yangi shartnoma imzolashiga umid qilib.

Ammo «Liverpul» qayta qurish bosqichiga kirmoqda va yozda jamoani katta o‘zgarishlar kutmoqda - buni hech kim yashirmaydi. Luis Dias, Darvin Nunyes va Kodi Gakpo so‘nggi bir yil davomida paydo bo‘ldi. Albatta, Kloppning Firminoga aytgan barcha iltifotlari samimiy, lekin yangi sharoitda u qancha vaqt maydonda bo‘lardi ham deysiz (axir Saloh va Diogo Jota ham bor-ku)? Joriy mavsumda braziliyalik futbolchining sog‘ligida alohida muammolar yo‘q (21 ta o‘yin, 16 tasi boshlang‘ich tarkibda va 9 ta gol), lekin ushbu natijaning qaytishiga kafolat yo‘q. Oktyabr oyida Bobbi 32 yoshga kirdi - endi o‘zgarish vaqti keldi, keyin juda kech bo‘ladi. Firmino har doim eng fidoyi futbolchi bo‘lgan, ammo bu holatda braziliyalikni tushunish mumkin: u zaxira o‘yinchisi bo‘lishga emas, balki loyihaning markazida bo‘lishga loyiq.