Superliga 3-turidan o‘rin olgan “Metallurg” – “Qizilqum” (1:0) uchrashuvidan keyingi matbuot anjumanida mehmonlar bosh murabbiyi Asror Aliqulov o‘z fikrlarini bildirib o‘tdi.

“Metallurg” mavsumni muvaffaqiyasiz boshlagan edi va shu sabab raqib jamoa futbolchilari ilk daqiqadanoq bosim uyushtirib, g‘alaba uchun borini berishlarini bilar edik. Shuning uchun asosan qarshi hujumda o‘ynashga e’tibor qaratdik. Birinchi bo‘limda qulay imkoniyatga ega bo‘ldik, ammo uni golga aylantira olmadik. Qolaversa, qizil kartochka rejamizning buzilishiga olib keldi.

Zamonaviy futbolda to‘psiz o‘ynash ham muhim ahamiyat kasb etadi. Islom Toshpo‘latov to‘p bilan yaxshi harakat qiladi, ammo to‘psiz harakatlanish borasida o‘z ustida ishlashi lozim.

Yangi futbolchilarni ro‘yxatdan o‘tkazishdagi 10 futbolchi limiti bizni ancha qiynadi. Darvoza chizig‘iga ham futbolchi olmoqchi edik. Ammo, ularni birgina videoroligini ko‘rib jamoaga taklif etolmaymiz. Bizda Ilyosov va Makosindan boshqa darvozabon yo‘q. Umid qilamanki, Javohir o‘ziga kelib oladi”, – dedi Aliqulov.