Суперлига 3-туридан ўрин олган “Металлург” – “Қизилқум” (1:0) учрашувидан кейинги матбуот анжуманида меҳмонлар бош мураббийи Асрор Алиқулов ўз фикрларини билдириб ўтди.

“Металлург” мавсумни муваффақияциз бошлаган эди ва шу сабаб рақиб жамоа футболчилари илк дақиқаданоқ босим уюштириб, ғалаба учун борини беришларини билар эдик. Шунинг учун асосан қарши ҳужумда ўйнашга эътибор қаратдик. Биринчи бўлимда қулай имкониятга эга бўлдик, аммо уни голга айлантира олмадик. Қолаверса, қизил карточка режамизнинг бузилишига олиб келди.

Замонавий футболда тўпсиз ўйнаш ҳам муҳим аҳамият касб этади. Ислом Тошпўлатов тўп билан яхши ҳаракат қилади, аммо тўпсиз ҳаракатланиш борасида ўз устида ишлаши лозим.

Янги футболчиларни рўйхатдан ўтказишдаги 10 футболчи лимити бизни анча қийнади. Дарвоза чизиғига ҳам футболчи олмоқчи эдик. Аммо, уларни биргина видеоролигини кўриб жамоага таклиф этолмаймиз. Бизда Илёсов ва Макосиндан бошқа дарвозабон йўқ. Умид қиламанки, Жавоҳир ўзига келиб олади”, – деди Алиқулов.