«MYU» tarkibiga zo‘r tushgan Kazemironi oxirgi vaqtlar qandaydir «qora kuch» ta’qib etayotgandek.
Braziliyalik yarim himoyachi «qizil iblislar» safiga qo‘shilishiga qadar, ya’ni butun faoliyati davomida biror marta to‘g‘ridan-to‘g‘ri qizil kartochka olgan emasdi, APLdagi debyut mavsumida esa ikki marta shunday jazoga ro‘baro‘ bo‘ldi. Angliyada xush ko‘rdik, Kazu!
Braziliya milliy jamoasi vakili 12 mart kuni autsayder - «Sautgempton»ga qarshi kechgan o‘yin (0:0)da orttirgan «qizil» tufayli ichki musobaqa doirasidagi keyingi 4ta uchrashuvni o‘tkazib yuboradi. Binobarin, Kazemiro joriy mavsum ikkinchi marta maydondan chetlashtirildi. Shu tariqa APLda Kazu uchun 10ta o‘yinni o‘z ichiga olgan qandaydir «qora chiziq» yuzaga kelmoqda.
***
Aytgancha, Kazemiro o‘tmishni xotirlar ekan, hozirgi muvaffaqiyatlarining asosiy sababchisi
sifatida onasini qayd etadi:
“Onam har kuni, dam olish kunlari ham farroshlik qilardi. Otam uch yoshligimda bizni tark etgan. Uni eslay olmayman va u haqida hech nima bilishni istamayman. Yodimda qolgan va men g‘ururlanadigan eng yorqin vaziyat: professional futboldagi ilk jiddiy maoshimni olganim. O‘sha vaqtda darhol onam uchun uy sotib oldim, men shu darajaga yetgunimga qadar kurashgan va ko‘plab azob-uqubatlarni boshdan kechirgan onam uchun”.
