Qo‘qon shahriga Kuytun shahar hokimi boshchiligidagi delegasiya tashrif buyurdi. Qo‘qon shahar hokimligida ikki tomon rasmiylari va ishbilarmon doiralari o‘rtasida o‘tkazilgan muloqot chog‘ida davlatlarimiz rahbarlarining tashabbuslari bilan turli sohalarda o‘zaro manfaatli aloqalar rivojlanib borayotgani ta’kidlab o‘tildi.

Kuytun shahar hokimi Altay Saken boshchiligidagi delegasiya a’zolari shahrimiz hokimi Ma’rufjon Usmonov hamrohligida “Qo‘qon-1912»ga qarashli “markaziy” stadionga tashrif buyurishdi. Xitoylik mehmonlar o‘zbek futbolining eng birinchi jamoasi tarixi bilan qiziqishdi. Klub rahbari Akramjon Mamadaliyev mehmonlarga jamoa tarixi hamda ushbu kundagi holati haqida so‘zlab berdi. Mehmonlar futbolchilar bilan suhbatlashib esdalik uchun suratga tushishdi. “Markaziy” maydonida Kuytun hamda Qo‘qon shahar hokimlari o‘zaro to‘p tepish bo‘yicha kichik bellashuvga kirishdilar.

Jamoa rahbariyati tomonidan janob Altay Sakenga mehmonning ismi tushirilgan “Qo‘qon-1912» formasi hamda boshqa esdalik sovg‘alar taqdim qilindi. Kuytun shahar merida “Qo‘qon-1912» jamoasining tarixi katta taassurot qoldirdi.

Har ikki hokimlar Qo‘qon va Kuytun shaharlari o‘rtasida do‘stlik aloqalarini rivojlantirish borasidagi memorandumni imzoladilar.