Mavsum yakunlanishiga to‘qqiz tur qolgan bir paytda, Londonning "Arsenal" klubi mavsumdagi eng jiddiy to‘siqlardan birini yengib o‘tishi kerak bo‘ladi. Ular "Liverpul" bilan mehmonda, "Enfild"da to‘qnash keladi. Bu o‘yingoh yillar davomida Yevropaning eng kuchli jamoalari uchun ham o‘ta murakkab makon bo‘lib kelgan. APL bosh sovrini yana Londonga qaytishiga yaqin turgan bir paytda esa, "Arsenal"ni bu narsa qo‘rqitmasligi kerak. Qolgan to‘qqiz uchrashuvning har biri Mikel Arteta shogirdlari uchun qattiq sinov bo‘lishi turgan gap. Shularning ichida eng kattasi Liverpul shahriga safardir.
"Liverpul"ning 2022-23 yilgi mavsumi ko‘ngildagidek o‘tmayapti. Buni hamma bilib, ko‘rib turibdi. Shunday ekan, Yurgen Klopp jamoasining vajohati avvalgidek emas. Hozirgi "Liverpul" haqida aytish mumkin bo‘lgan birgina narsa bu jamoaning o‘ta beqarorligidir. "MYU"ni 7-0 hisobida taslim etib, "Bormunt"ga yutqazish, "Bormunt"ni 9-0 hisobida yanchib, "Lids"ga o‘z maydonida yengilish – fikrlarimiz isboti o‘laroq jaranglaydi. Mana shunday kutilmaganlik effekti bugungi bahsni yanada qiziqarliroq qiladi. Negaki, biz oldindan nima bo‘lishini taxmin qila olmaymiz.
Xususan, "Liverpul" "MYU"ga qarshi yirik hisobdagi g‘alabadan keyin APLda hali zafar quchmadi. Ammo hali ham mersisaydliklarda kuchli to‘rtlikka kirish imkoni saqlanib turibdi. Agarda "Arsenal"ga imkoniyat boy berilsa, keyin o‘sha kichik imkoniyat ham yo‘qqa chiqadi. Shu sababdan bugun "Liverpul" futbolchilari borini berib harakat qilishadi. Bugungi raqib esa "Arsenal" va bu jamoa chempionlikka eng yaqin turgan vakildir.
Jamoalar sport formasi qanday?
"Liverpul" yuqorida aytilganidek, "MYU"ni martni boshida mag‘lub qilganidan buyon, hali g‘alabaga erishmadi. "Bormunt", "Manchester Siti" va "Real"ga ikki marta mag‘lubiyatga uchraldi. Jamoaning eng so‘nggi bahsi o‘ziga o‘xshagan ahvoldagi "Chelsi"ga qarshi edi va bu uchrashuvda hisob ochilmadi. Ushbu faktlarga qarama-qarshi ravishda, "Arsenal"ning darajasi ancha yuqori bo‘lib turibdi. Londonliklar fevral o‘rtasidan beri mag‘lubiyat nimaligini bilmay kelmoqda. "Manchester Siti"ga mag‘lubiyatdan keyin "Arsenal" ligada ketma-ket 7 ta o‘yinda g‘alabaga erishdi. Yevropa ligasida 2 ta durang qayd etdi. O‘sha natijalar to‘pchilarning APLdagi yetakchiligini ta’minlab turibdi. "Liverpul" bilan birinchi davrdagi bahs, 3-2 hisobida "Arsenal" foydasiga hal bo‘lgandi.
Kimlar porlaydi?
"Liverpul" so‘nggi 4 ta o‘yinda bitta gol urishga erishgan va bu juda yomon natija sanaladi. Shu sabab bugun "MYU" bilan bahsda bo‘lgani kabi Muhammad Salohga suyaniladi. Misrlik hujumchi o‘z nomiga bu mavsum davomida 12 ta gol va 7 ta assist yozdirib qo‘ya olgan.
To‘pchilar safida porlash uchun Bukayo Sakadan yaxshiroq variant bo‘lmasa kerak. Ammo Gabriel Jezusning qaytganini ham ta’kidlab o‘tish joiz. Braziliya terma jamoasi a’zosi uzoq muddatlik jarohatdan keyin safga qaytdi va o‘tgan turda "Lids"ga qarshi dubl sohibiga aylandi. Bu esa "Arsenal" uchun yaxshi signaldir.
Kimlar jarohat olgan?
"Liverpul"da muammolar yetarlicha. Xususan, Virjil van Deyk shamollash sababli "Chelsi" bilan o‘yinda maydonga tushmagandi. Ammo "Arsenal" bilan bahsga qaytadi. Shuningdek, Luis Dias va Nabi Keyta hali ham lazaryatda yotibdi. Asosiy tarkib vakillari bo‘lgan Saloh, Trent, Robertson va Gakpolar Londondagi so‘nggi uchrashuvni zaxiradan boshlagandi. Tiago Alkantara mashg‘ulotlatda ishtirok etdi. Ispaniyalik bugungi tarkibga kiritilishi mumkin.
"Arsenal" safida muhim figura sanalgan Vilyam Saliba jarohat sababli maydonga qaytgani yo‘q. Bukayo Saka bilan endi hammasi joyida. Eddi Nketia tuzalishni davom ettirmoqda va tez orada safga qaytadi, ammo bugungi o‘yinda uni ko‘rmaymiz. Shuningdek, yarim himoyachi Muhammad Elneni hamda himoyachi Takexiro Tomiyasular joriy mavsumning qolgan qismida maydonga tushmasligi ma’lum bo‘lgan.
ISMATOV J.
