Superliganing 5-turidan o‘rin olgan OKMK – “Navbahor” (2:1) o‘yinidan keyingi matbuot anjumanining ikkinchi qismida OKMK bosh murabbiyi Mirjalol Qosimov qatnashib, jurnalistlarning savollariga javob berdi. Olmaliqliklar ustozi o‘z so‘zini o‘yin haqidagi fikrlari bilan boshladi.
- O‘yinning qiziqarli o‘tishi kutilgandi. Ikki jamoa ham bir-biriga munosib. O‘tgan yilgi bahslarda ham kurashlarga boy va ochiq futbol bo‘lgandi. Bunga tayyorgarlik ko‘rgandik. Yigitlar yaxshi harakat qilishdi. Qiziqarli o‘yin guvohi bo‘ldik. Birinchi bo‘limda ikkinchi bo‘limga qaraganda kuchliroq harakat qildik. Bugungi bahs turning eng qiziq o‘yini bo‘lsa kerak. O‘yin muxlisbop bo‘ldi.
- Bugun yoshi katta futbolchilardan Sanjar Tursunov va Anzur Ismoilov yaxshi harakat qilishdi. Ularning tajribasi haqida nima deya olasiz?
- Ushbu o‘yinchilarning jamoadagi o‘rni muhim. Bu yillar davomida yig‘iladigan tajriba. Mana, Jasur Hasanov ham 40 yoshida o‘ynayapti. Bunday o‘yinchilar Yevropada ham bor.
- Jamoaning joriy mavsumdagi maqsadi qanday?
- Bu savol har o‘yinda beriladi. Maqsad bo‘lmasa, ishlashning hojati yo‘q.
- Tunislik legioner Muhammad Salim va o‘tgan mavsum “Olimpik”da porlagan Elyor Begimovga yetarlicha imkoniyat berilmayapti. Ularning o‘yinidan qoniqmayapsizmi?
- Eng ko‘p rotasiya qiladigan murabbiy o‘zimman. Mabodo, futbol 20 ga 20 futbol o‘ynalganida, barchani maydonga tashlardim. Chempionat hali ancha vaqt davom etadi, o‘yinlar juda ko‘p. Vaqti kelganda, ularga ham imkoniyat taqdim etiladi.
- Jarohat olgan Mirjamol Qosimov va Vitaliy Denisov qachon safga qaytishadi?
- Ular endi mashg‘ulotlarga kirishdilar. Qachon jismonan tayyor bo‘lishsa, ularni maydonda ko‘rasizlar.
