Суперлиганинг 5-туридан ўрин олган ОКМК – “Навбаҳор” (2:1) ўйинидан кейинги матбуот анжуманининг иккинчи қисмида ОКМК бош мураббийи Миржалол Қосимов қатнашиб, журналистларнинг саволларига жавоб берди. Олмалиқликлар устози ўз сўзини ўйин ҳақидаги фикрлари билан бошлади.
- Ўйиннинг қизиқарли ўтиши кутилганди. Икки жамоа ҳам бир-бирига муносиб. Ўтган йилги баҳсларда ҳам курашларга бой ва очиқ футбол бўлганди. Бунга тайёргарлик кўргандик. Йигитлар яхши ҳаракат қилишди. Қизиқарли ўйин гувоҳи бўлдик. Биринчи бўлимда иккинчи бўлимга қараганда кучлироқ ҳаракат қилдик. Бугунги баҳс турнинг энг қизиқ ўйини бўлса керак. Ўйин мухлисбоп бўлди.
- Бугун ёши катта футболчилардан Санжар Турсунов ва Анзур Исмоилов яхши ҳаракат қилишди. Уларнинг тажрибаси ҳақида нима дея оласиз?
- Ушбу ўйинчиларнинг жамоадаги ўрни муҳим. Бу йиллар давомида йиғиладиган тажриба. Мана, Жасур Ҳасанов ҳам 40 ёшида ўйнаяпти. Бундай ўйинчилар Европада ҳам бор.
- Жамоанинг жорий мавсумдаги мақсади қандай?
- Бу савол ҳар ўйинда берилади. Мақсад бўлмаса, ишлашнинг ҳожати йўқ.
- Тунислик легионер Муҳаммад Салим ва ўтган мавсум “Олимпик”да порлаган Элёр Бегимовга етарлича имконият берилмаяпти. Уларнинг ўйинидан қониқмаяпсизми?
- Энг кўп ротация қиладиган мураббий ўзимман. Мабодо, футбол 20 га 20 футбол ўйналганида, барчани майдонга ташлардим. Чемпионат ҳали анча вақт давом этади, ўйинлар жуда кўп. Вақти келганда, уларга ҳам имконият тақдим этилади.
- Жароҳат олган Миржамол Қосимов ва Виталий Денисов қачон сафга қайтишади?
- Улaр энди машғулотларга киришдилар. Қачон жисмонан тайёр бўлишса, уларни майдонда кўрасизлар.
