Lionel Messi barcha davrlardagi eng yaxshi to‘purarlardan biri sanaladi. 2004 yilda Messi "Barselona"da ilk marta maydonga tushadi va ilk o‘yinidayoq gol urishga erishadi. Yevropaning kuchli ligalaridagi futbol shiddat bilan o‘zgarib bormoqda. Vaqt o‘tgani sari Zidan, Shirer, Ronaldo kabi buyuklar o‘z butsalarini devorga ildi. Ammo Messi o‘z yo‘lida hamon davom etmoqda. Xo‘sh, argentinalik daho davridagi eng yaxshi to‘purar kim? Bu savolga quyida javob olishingiz mumkin.

10. Edin Jeko – 221 ta gol

Bosniyalik hujumchi 2007 yildan beri katta sahnalarda o‘zini ko‘rsatib kelmoqda. Gollar borasida uning natijasi Runi, Obameyang, Immobile va Vilyalarnikidan qolishmaydi. Jeko 2008-09 yilgi mavsumda "Volfsburg" bilan Germaniya chempioni bo‘ladi, "Manchester Siti"ga ilk APL titulini taqdim etadi. U "Roma" safida ham uzoq harakat qilib, 199 ta bahsda 85 ta gol urishga erishgandi. Ayni damda 37 yosh bo‘lgan qahramonimiz "Inter" sharafini himoya qilmoqda.

9. Gonsalo Iguain – 237 ta gol

O‘z avlodining eng yaxshilaridan biri bo‘lgan futbolchi, gollar urish borasida o‘ta barqaror edi. Iguain "Real" safida 100 dan ortiq golga mualliflik qiladi. "Napoli" bilan ham 71 ta gol urishga erishadi. "Yuventus" safida argentinalik hujumchi Italiya chempioniga aylanadi.

8. Luis Suares – 248 ta gol

Suares 2011 yilning avvalida "Ayaks"ga olib kelinadi. O‘shanda u 24 yosh edi. "Liverpul"da katta sahnaga chiqqan hujumchini 2014 yilda "Barselona" xarid qiladi. Suares Kataloniyada 6 mavsum harakat qilib, klub tarixidagi uchinchi eng yaxshi to‘purarga aylanib olgan edi.

7. Serxio Aguero – 259 ta gol

Messining eng yaxshi do‘stlaridan biri bo‘lgan Aguyero 2006 yilda, 18 yoshida Yevropaga yo‘l oladi. U "Ateltiko" safida 74 ta gol urishga erishgan. "Manchester Siti"dagi davri Agueroning yuqori darajasi sifatida qaraladi. Hujumchi 10 mavsum davomida 4 marta chempionlikka erishgan edi. Yurak bilan bog‘liq muammo Agueroni 33 yoshida futboldan ketishga majbur qilgandi.

6. Edinson Kavani – 267 ta gol

Urugvayning nomsiz jamoasidan 2007 yilda "Palermo" 20 yoshli hujumchini xarid qiladi. Hech kim Kavanining hozirgi darajasiga chiqadi deb o‘ylamagan. Urugvaylik futbolchi "Napoli" va "PSJ"da fantastik o‘yinlari bilan yodimizda qolgan. "Manchester Yunayted", hozir esa "Valensiya"da, u o‘z ishini davom ettirmoqda.

5. Karim Benzema – 276 ta gol

Messi singari Benzema ham professional futbolga 2004 yilda kirib kelgan. U "Lion"da o‘sishni boshlaydi. 2009 yilda "Real" fransuz hujumchisini xarid qiladi. To‘qqiz yil davomida Ronaldu soyasida yurgan futbolchi, ayni damga kelib asl darajasini namoyish etmoqda. Benzema "Real" bilan 233 ta gol urishga muvaffaq bo‘ldi.

4. Zlatan Ibragimovich – 298 ta gol

Ibragimovich "Yuventus" tomonidan 2004 yilda sotib olinadi. U bu damga qadar "Malmyo"da 16 ta, "Ayaks"da esa 35 ta gol urishga erishgandi. Shundan keyin, ushbu nom yuzlab gollar urdi. Ular Italiya, Fransiya, Ispaniya va Angliyada yuz berdi. Ayni damda 41 yosh bo‘lishiga qaramay, Ibragimovich o‘z yo‘lidan hali qaytgani yo‘q. Nafaqa u uchun begonaligicha qolmoqda.

3. Robert Levandovski – 329 ta gol

Polshalik hujumchi dunyoga Yurgen Kloppning "Borussiya Dortmund"ida tanildi. "Bavariya" tomonidan sotib olingach, Levandovski har yili Germaniya chempionligiga erishdi. O‘tgan mavsumda "Barselona"ga o‘tgan qahramonimiz, o‘zining debyut mavsumidayoq 17 ta gol urishga erishdi.

2. Krishtianu Ronaldu – 491 ta gol

Ushbu ro‘yxatdagi yagona Messidan oldin debyut qilgan futbolchi Ronaldudir. U 2003 yilda "Manchester Yunayted"ga yo‘l oladi. Portugaliya yulduzi Messining debyutiga qadar APLda 4 ta gol urishga erishgandi. "Real"da afsonaga aylangan futbolchi, Italiyaning "Yuventus" klubida ham bir muddat harakat qildi. U kuchli beshlik chempionatlarida gol urish borasida rekordchi hisoblanadi. Agarda Ronalduning "Sporting" va "MYU"dagi gollarini ham qo‘shsak, u 498 ta gol bilan Messidan oshib ketgan bo‘lardi.

1. Lionel Messi – 494 ta gol

Messi bo‘lmasa, yana kim ham bo‘lardi? Bu so‘zning aytililishi har qanday solishtirishlarda deyarli muqarrardir. "Barselona" safida argentinalik afsona 520 ta o‘yinda 474 ta golga mualliflik qildi. Bu esa Yevropadagi mutlaq rekord sanaladi. Messi "PSJ" bilan ham 20 ta gol urishga erishdi.

ISMATOV J.