Jud Bellingem kelayotgan yozda o‘ziga yangi jamoa tanlaydi. Uning borishi mumkin bo‘lgan eng ideal manzillardan biri "Real" bo‘lsa kerak. Tarixda ko‘p ham britaniyalik futbolchilar "Real" sharafini himoya qilmagan. Ammo La-liga giganti safida o‘ynagan britlar o‘ziga xos ta’sirga ega bo‘la olgandi. Quyida "Real" tarixida klub libosini kiya olgan Buyuk Britaniya fuqarolari haqida so‘z boradi.
Garet Beyl
U "Real"day jamoada o‘ynay turib, ispan madaniyatini mensimaslik va golfga qiziqishi bilan hammaning e’tiborini tortgandi. Beyl Ispaniya boshkentida katta shuhrat qozongan. 2013 yilda "Real", o‘sha paytdagi rekord summa evaziga "Tottenxem" hujumchisini sotib oladi. Uelslik afsona La-liga va jahon sahnida ko‘plab ajoyib gollarga mualliflik qildi. Bu borada, uning birgina Kiyevdagi YECHL finalida urgan golini eslash yetarlidir. Beyl jami besh marta YECHL kubogiga ega chiqqan.
Jonatan Vudgeyt
"Real" tarixidagi eng yomon debyutga mualliflik qilgan futbolchining Ispaniyadagi davri o‘ta yomon o‘tgandi. Himoyachi jarohat sababli bir yil maydonga tusha olmay qiynaladi. Tushganida esa avto-gol va qizil kartochkaga loyiq topiladi. 2005-2006 yilgi mavsum oxirida Vudgeyt yana "Midlsbro" safiga qaytib ketgandi. 2007 yilda futbolchi "Real"ning amalga oshirgan eng yomon xaridi sifatida muxlislar tomonidan e’tirof etiladi.
Maykl Ouen
Ouenning "Real"ga ko‘chishi o‘zi o‘ylagandek kechmadi. Negaki, hujumchi Galaktikosning ayni avj pallasida "Real"ga keladi. Raul, Ronaldo va Zidan kabi futbolchilarni yengib, asosiy tarkibga kirish u paytda deyarli imkonsiz bo‘lgan. Ouen "qirollik klubi"ga 45 ta o‘yinda 16 ta goli bilan yordam bergandi. 2005 yilda ingliz futbolchisi doimiy o‘yin amaliyotiga ega bo‘lish uchun "Nyukasl"ga yo‘l oladi. Maykl Ouen Ispaniyadagi davrini o‘ta og‘ir o‘tgan deb baholagandi.
Devid Bekxem
Galaktikos davri edi. 2003 yilning yozida "Real" shundoqqina "Barselona"ning tumshug‘i tagidan Bekxem transferini ӯg‘irlab ketadi. Ingliz yarim himoyachisining jamoaga kelishi, futbolka sotuviga ijobiy ta’sir ko‘rsatgani bilan, Bekxem "Real"dagi dastlabki 3 yilida hech narsa yuta olmaydi. Fabio Kapello Bekxemdan asosiy tarkibda foydalanishni to‘xtatib qo‘ygandi. Ammo futbolchi o‘rni uchun kurashib, 2006-07 yilgi mavsumda Ispaniya chempionligiga erishadi. Bekxem butun boshli "Real"dagi paytida 155 ta o‘yinda maydonga tushib, 20 ta gol urishga erishgan. 2007 yilda u "LA Gelaksi"ga sotib yuboriladi.
Stiv Makmanaman
Makmanamanning "Real"dagi faoliyati futbolchining talantiga salbiy ta’sir ko‘rsatgandi. "Liverpul" safida porlagan futbolchi, 1999 yilda Ispaniyaga yo‘l oladi. U "Real" bilan ilk mavsumini YECHLdagi chempionlik bilan tugatgandi. Luish Figuning jamoaga kelishi, Makmanamanning maydondagi vaqtini kamaytiradi. U 2002 yilgi YECHL yarim-finalida "Barselona" darvozasiga to‘p kiritadi.
Luri Kanningem
Kanningem "Real" libosini kiygan ilk ingliz futbolchisi sanaladi. U 1979 yilda "Vest Brom"dan xarid qilinadi. Ajoyib hujumchi o‘zining debyut bahsida dubl qayd etadi. Ispaniyadagi birinchi mavsumni Kanningem chempionlik va kubok bilan tugatadi. U 1983 yilda Ispaniyani tark etadi. Oradan olti yil o‘tib, hujumchi avtohalokat sababli dahshatli o‘lim topadi. O‘shanda u endigina 33 yoshda edi.
ISMATOV J.
