«Metallurg» – OKMK (2:0) jamoalari uchrashuvidan keyin mezbonlar bosh murabbiyi Vesko Steshevich matbuot anjumanida ishtirok etdi.

O‘yin haqida

— Uchrashuvni raqib kutmagan tarzda shiddatli boshladik. O‘yin boshidayoq yaxshi vaziyatlar yaratdik. Gol urishimiz ham mumkin edi. Darvoza ustuni raqibning joniga oro kirdi. Raqib o‘yinchisi chetlatilgan holatgacha ham biz ustunlikka ega bo‘lib turgandik. Rosti mehmonlar sardori nega chetlatilganini tushunmadim. Qaysidar jamoaning maydonda kamchilik bo‘lib qolishini to‘g‘risi yoqtirmayman. Shuningdek, menga birinchi taymda kiritgan golimizni ham nega hisoblashmaganligi nomalumligicha qoldi.

Biz bundan oldingi kubok uchrashuvini aynan derbi uchun qurbon qilgandik. Bugun qarorimiz to‘g‘ri bo‘lganligiga yana bir bor ishonch hosil qildik. Asosiy tarkibni asraganligimiz bugun o‘z so‘zini  aytdi.

— Yangi klubingizdagi faoliyatingizni ikkita during bilan boshlagandingiz. Mazkur uchrashuv oldidan shogirdlaringizga qanday ko‘rsatmalar bergandingiz?
— Menda futbolchilar bilan muloqot qilish uchun vaqt yetarli bo‘ldi. Ularning imkoniyatlarini sinchkovlik bilan kuzatdim. Qolaversa, yigitlar viloyat derbisini yutishni juda istashayotganligini ko‘rdim. Menimcha, bundan ortiqroq motivasiya bo‘lmasa kerak. Futbolchilarimiz o‘zlarining potensial imkoniyatlarini to‘liq namoyish etishdi. Yanada ko‘proq gol urishimiz ham mumkin edi. Bu futbol. Aksi ham sodir bo‘lishi ehtimoli yo‘q emasdi. Yaxshi jamoani qabul qilib olganimdan so‘ng juda ko‘p ma’lumotlarga ega bo‘ldim. Ularni o‘rganishga, tahlil etishga ham ulgurdim. Birinchi uchrashuvga nisbatan menda tayyorgarlik ko‘rish uchun vaqt yetarli bo‘ldi. Afsuski, endi ritmga kirib borayotgan paytimizda ba’zi o‘yinchilarimiz terma jamoalarga jalb etilyapti. Bu albatta klubdagi ishlarimizga o‘zgartirishlar kiritishimizga  olib keladi.

— Ayrim o‘yinchilar, xususan, Zabihillo O‘rinboyev hamda Marko Obradovichning jismoniy holati haqidagi fikringizni bilmoqchi edik. Ular charchab qolishmadimi bugun?
— Bu savol sizda nima uchun tug‘ilganini bilmayman. Zabihilloning maydonda bajarayorgan ish hajmini tasavvur qilayapsizmi? O‘rinboyevdagi foydali ish koeffisiyenti juda yuqori. Tabiiyki, o‘yin oxiriga kelganda toliqish bo‘ladi. Biroq shogirdlarimning jismoniy tayyorgarligidan ko‘nglim to‘q. Ayniqsa Zabihilloning jamoamizdagi yetakchilik rolini alohida e’tirof etgan bo‘lardim.