Gus Xiddink 76 yoshida ham muloyim, xushmuomala va hazilkash xarakterini yo‘qotmadi.
O‘z an’anasiga sodiq qolgan holda dushanba va chorshanba kunlari Amsterdamda do‘stlari bilan uchrashadi. Uning butun hayoti koptok bilan o‘tdi, avval oyoqlarida, keyin qo‘llarida. U ham futbolchi, ham murabbiy edi. Faoliyati shunchaki ajoyib, hozir esa maslahatchi sifatida ishlamoqda.
Endi, u diqqat markazidan uzoqda, Niderlandiya murabbiylar Assosiasiyasining prezidenti va vaqti-vaqti bilan «PSV»ga ma’ruza o‘qish yoki yoshlarga yordam berish uchun keladi: «Xavi Simonsning kelajagi katta», deydi u MD-ga ushbu intervyusida, agar u o‘sishni davom ettirmoqchi bo‘lsa, unga muhim maslahatlar beradi. Hatto uzoqdan ham Xiddink futbol tartibining bir qismi bo‘lishga intilayotgani ko‘rinib turibdi.
- «PSV» - bu sizning butun boshli hayotingiz o‘tgan klub...
- Ha, ajoyib vaqtlar edi. Ayniqsa 1988 yilda beshta Niderlandiya chempioni, to‘rtta mamlakat Kubogi va albatta, Chempionlar Ligasida g‘olib chiqqanimiz. Murabbiylik faoliyatimning bunday boshlanishi haqiqatan ham g‘ayrioddiy edi, chunki bu unga har jihatdan katta rag‘bat va rezyumeimning mustahkamligini berdi. O‘sha yillarni unutishning iloji yo‘q va endi men «PSV»ga kerak bo‘lganda yordam beraman.
- Qayerda eng ko‘p baxtli edingiz?
- Bu savolga aniq javob berolmayman. Niderlandiyada baxtli edim, lekin Valensiyada ham hammasi yaxshi edi, hozirgacha vaqti-vaqti bilan ta’til paytida u yerga qaytib, do‘stlarimni ko‘rishni yaxshi ko‘raman. Betisdan, bu qisqa tajriba bo‘lsa-da, menda ham yaxshi xotiralar bor. Va qanday qilib «Real» yoki «Chelsi»ni eslamasligim mumkin? Biroq, men futbolchi sifatida eng yaxshi vaqtni o‘tkazdim.
- Murabbiy bo‘lishdan yaxshiroqmi?
- Shubhasiz. Mashq qildirishdan ko‘ra o‘ynash har doim yaxshiroqdir.
- «PSV»da sizning qo‘l ostingizda Kuman o‘ynagan. Uning murabbiy bo‘lishini kutganmisiz?
- Hayotda har doim kutilmagan hodisalar bo‘ladi va siz kutmagan o‘yinchilar bu qadamni qo‘yishadi. Kuman bilan bunday bo‘lmagan. U kyinish xonasida paydo bo‘lgan birinchi lahzadan boshlab, ertami-kech murabbiy kursisiga o‘tirishini bilardim. Maydonda undan yordamchim sifatida foydalanganman. Odatda, murabbiy o‘yin davomida hamma narsani nazorat qila olmaydi va siz ishonadigan odamga ega bo‘lish taskin beradi. Kuman mening g‘oyalarim uchun qo‘llanma edi.
- «Barselona»da unga yomon munosabatda bo‘lishgan, deb o‘ylaysizmi?
- Kuman jasorat bilan harakat qildi, «Barselona»ga klub uchun notinch davrda, pandemiya va jiddiy boshqaruv inqirozi paytida keldi. Menimcha, uning ishdan bo‘shatilishi hamma narsadan ko‘ra o‘tmish va hozirgi direktorlar kengashi o‘rtasidagi urush bilan bog‘liq. Garchi natijalar birinchi mavsumdagidek yaxshi bo‘lmasa-da, u jamoani Qirol Kubogida g‘alaba qozonishiga olib keldi. Ikkinchi mavsumda u Messining ketishi bilan «Barselona» tarixidagi eng dramatik boshqaruv vaziyatiga duch keldi.
- «Kamp Nou»da barchadan shunday qat’iy so‘rashadi, ayniqsa Gvardiolaning ketganidan so‘ng...
- Kuman bilan adolatsizlik kuzatildi. Shunchaki davr «Barselona»da ishlash uchun eng yaxshisi emasdi, lekin bunday taklifni olganingizda, undan voz kecholmaysiz. Bunday imkoniyat hayotda bir marta tushadi. «Real»da men bilan ham xuddi shunday bo‘lgandi. Ronald bilan gaplashdim, lekin bu haqda emas, chunki bu hali ham unga zarar yetkazayotganini tushunaman.
- Yangilangan Niderlandiya terma jamoasidan nimalarni kutyapsiz?
- Fransiyadan mag‘lubiyat og‘ir bo‘lib chiqdi, ammo bu haqiqat sinovi - dars edi. Biz ko‘p ish qilishimiz kerak. Kuman Millatlar Ligasini yaxshi o‘tkazish uchun ajoyib imkoniyatga ega. O‘ylaymanki, bu bizga vazifani bajarayotganimizni tushunishga yordam beradi va biz Yevro-2024da g‘alaba qozonish uchun nomzodlar qatorida ekanligimizni bilib olamiz. Ko‘p yillar davomida Angliya va Ispaniyaning eng yaxshi klublarida bo‘lgan tajribali futbolchilar bor, shunchaki oldinga qadam tashlash kerak.
- Xavi Simons terma jamoada muhim rol o‘ynashi kerakmi?
- Uni tez-tez ko‘rib turibman va u bilan «PSV»dagi mashg‘ulotlarda uchrashganman ham. Menimcha, u g‘ayrioddiy iste’dodga ega, ammo siz sabrli bo‘lishingiz kerak, chunki bu yoshda ko‘tarilish va pasayishlarni boshdan kechirish mutlaqo normaldir. Qanday bo‘lmasin, uning taraqqiyoti umid baxsh etadi. Bir necha yil Erediviziya o‘ynash uning foydasiga bo‘lishi mumkin.
- Demak, uning kelajagi boshqa ligada deb o‘ylaysiz?
- Albatta. Niderlandiya o‘sish va rivojlanishni xohlaydigan yoshlar uchun qiziqarli o‘yin maydonchasidir, ya’ni ideal joy. Biroq, 25-26 yoshda, ular uchun boshqa alternativalarni izlash va Gakpo yoki boshqalar kabi APLga o‘tish odatiy holdir.
- Unga «PSJ»ga qaytishni tavsiya etmaysizmi?
- «PSJ» katta yulduzlarga pul tikayotgan bo‘lsa-da, menimcha, Xavi Simons u yerda biror narsani ko‘rsatish uchun ko‘p imkoniyatga ega emas. U yerga borishni maslahat bermayman. Har holda hozir qaytish uchun yomon vaqt. Men unga hozirgi joyida yana bir necha yil qolishni maslahat beraman. Uning yoshida, 19 yoshida, o‘yin amaliyotiga ega bo‘lish, o‘zini muhim his qilish muhim va Parijda, menimcha, u ko‘p vaqtini zaxirada o‘tkazgan bo‘lardi.
- Bu eng oson klub emas. Hatto Messi uchun ham...
- Men uning kelajagi bilan nima qilishini bilmayman va men unga biror narsa aytadigan odam emasman. Aytishim mumkinki, u men ko‘rgan eng o‘ziga xos futbolchi. Mbappe esa hozirgi va kelajakdir. U himoyada ishlash zarurligini tushunadi va menimcha, bu muhim fazilat, chunki Chempionlar Ligasida g‘alaba qozonish uchun iste’dodning o‘zi yetarli emas.
- Faoliyatingizning katta qismi terma jamoalar boshqaruvida o‘tdi. Rossiyani boshqarganingizdan afsuslanmaysizmi?
- Mutlaqo. Bu biz hozir boshdan kechirayotgan falokat bilan hech qanday aloqasi bo‘lmagan ajoyib tajriba edi. 2006 yildan 2010 yilgacha biz juda yaxshi ish qildik, barchamiz birgalikda qurganimizdan faxrlanaman va Yevro-2008dagi 3-o‘rin abadiy qoladi. Faqat Ispaniya bizni yarim finalda mag‘lub etgandi.
M.PO‘LATOV tayyorladi
