Xabaringiz bor, O‘zbekiston chempionatida joriy chempionatda ilk albaniyalik legioner sifatida faoliyatini boshlagan hujumchi Rubin Xebay “Andijon” jamoasidagi gollari hisobini ochishga muvaffaq bo‘ldi.

Superliganing 7-turida “Burgutlar” Farg‘onadagi “Istiqlol” stadionida Bekobodning “Metallurg” klubini qabul qilib, javobsiz 5 ta gol urgan holda yirik hisobdagi g‘alabani tantana qildi.

Ushbu bellashuv albaniyalik legionerga ataldi, desak aslo mubolag‘a bo‘lmaydi. Xebay yangi klubidagi debyut golini urishdan tashqari, o‘zining xet-trigini ham amalga oshirishga muvaffaq bo‘ldi. Ayniqsa, uning 9-daqiqadayoq dubl qayd etgani va o‘yinni jamoasi kabi o‘ta shiddatli boshlagani barchaning e’tiborini tortdi.

Rubin Xebayning “Andijon” safida xet-trikka erishgani Albaniya matbuotida ham aks-sado keltirib chiqardi.

Jumladan, qator alban nashrlari Rubinning “Burgutlar” safida uchta gol urgani va buning evaziga “Andijon”ning 5:0 hisobida g‘alaba qozonganini yozib chiqdilar.

Ulardan biri “VeriuSport” quyidagi mazmunda xabar yozdi: 

“Xebay O‘zbekistonda ham o‘zining xet-trigini davom ettiryapti”

“Yanvar oyida O‘zbekiston chempionatiga transfer qilingan Rubin Xebay o‘zining yangi jamoasi - “Andijon”dagi katta yurishini amalga oshirdi.

Hujumchi “Metallurg”ga qarshi uchrashuvda 90 daqiqa ichida 3 ta gol urishga muvaffaq bo‘ldi va uning jamoasi ushbu xet-trik tufayli 5:0 hisobida raqibidan ustun keldi.

Xebay uchrashuvda gollar shousini ochib bergan dastlabki ikkita golning muallifiga aylandi va jamoasining to‘rtinchi golini 83-daqiqada raqib darvozasiga kiritdi.

Ushbu g‘alaba orqali “Andijon” 9 ochko bilan turnir jadvalining 9-pog‘onasiga joylashdi”, - deyiladi Xebayga taalluqli xabarda.

“Andijon” matbuot xizmati.