Pro liganing 7-turidan o‘rin olgan "Navbahor-farm" — "Mash’al" uchrashuvidan so‘ng mehmonlar bosh murabbiyi Bobur Zuhriddinov matbuot anjumanida ishtirok etdi.

O‘yin haqida
— Guvohi bo‘lganingizdek, shiddatli o‘yin guvohiga aylandik. Bugun ikkala jamoa ham g‘alaba qozonishga loyiq o‘yin ko‘rsatdi. Bu yerga g‘alaba ilinjida tashrif buyurgandik. Biroq birinchi bo‘limdagi ba’zi xatolarimiz evaziga kutilmagan gollar o‘tkazib yubordik. Yigitlarga minnatdorchilik bildiraman. Ular oxirigacha kurashdi.

— Hakamlar va "Navbahor-farm" haqida nima deya olasiz?
— Namangan shahri hamisha futbol shahri bo‘lgan. Bu yerga kelishning o‘zgacha shukuhi bor. Bu yerdagi muxlislik O‘zbekistonning kam shaharlarida kuzatiladi. Shu bois, bu yerda mehmon sifatida o‘ynash ham yoqimli. "Navbahor-farm"ga qarshi jiddiy tayyorlandik. Jamoaning o‘tgan uchta o‘yinini tahlil qildik. Joriy mavsum namanganliklar ko‘p jamoaga boshog‘riq bo‘ladi. Hakamlar masalasida biror fikr ayta olmayman, chunki ularning faoliyatini tahlil qiladigan insonlar bor.

— "Mash’al" joriy mavsum oxirida Superligaga chiqa oladimi?
— Bu yo‘lda imkon boricha harakat qilyapmiz. Rahbariyat ham qo‘llab-quvvatlamoqda. "Mash’al" haqiqiy joyiga qaytishi uchun qo‘limizdan kelganini qilamiz.

— "Obod" jamoasida faoliyat olib borayotgan paytingiz, "Navbahor" kelishingiz haqida mish-mishlar tarqagandi. Bu gap qanchalik haqiqatga yaqin?
— Menga hech kim bunday taklif bilan chiqmagan. Bu gapni ilk bor sizdan eshitishim.

— Pro ligadagi asosiy raqobatchilaringiz qaysi jamoalar sanaladi?
— Avval aytganimdek, ligada kuchsiz jamoaning o‘zi yo‘q. Chempionat endi boshlandi. Hali hammasi oldinda. Bizda bitta zaxira o‘yini mavjud. Mavjud o‘yinlarda ochko olishga harakat qilamiz.