Про лиганинг 7-туридан ўрин олган "Навбаҳор-фарм" — "Машъал" учрашувидан сўнг меҳмонлар бош мураббийи Бобур Зуҳриддинов матбуот анжуманида иштирок этди.

Ўйин ҳақида
— Гувоҳи бўлганингиздек, шиддатли ўйин гувоҳига айландик. Бугун иккала жамоа ҳам ғалаба қозонишга лойиқ ўйин кўрсатди. Бу ерга ғалаба илинжида ташриф буюргандик. Бироқ биринчи бўлимдаги баъзи хатоларимиз эвазига кутилмаган голлар ўтказиб юбордик. Йигитларга миннатдорчилик билдираман. Улар охиригача курашди.

— Ҳакамлар ва "Навбаҳор-фарм" ҳақида нима дея оласиз?
— Наманган шаҳри ҳамиша футбол шаҳри бўлган. Бу ерга келишнинг ўзгача шукуҳи бор. Бу ердаги мухлислик Ўзбекистоннинг кам шаҳарларида кузатилади. Шу боис, бу ерда меҳмон сифатида ўйнаш ҳам ёқимли. "Навбаҳор-фарм"га қарши жиддий тайёрландик. Жамоанинг ўтган учта ўйинини таҳлил қилдик. Жорий мавсум наманганликлар кўп жамоага бошоғриқ бўлади. Ҳакамлар масаласида бирор фикр айта олмайман, чунки уларнинг фаолиятини таҳлил қиладиган инсонлар бор.

— "Машъал" жорий мавсум охирида Суперлигага чиқа оладими?
— Бу йўлда имкон борича ҳаракат қиляпмиз. Раҳбарият ҳам қўллаб-қувватламоқда. "Машъал" ҳақиқий жойига қайтиши учун қўлимиздан келганини қиламиз.

— "Обод" жамоасида фаолият олиб бораётган пайтингиз, "Навбаҳор" келишингиз ҳақида миш-мишлар тарқаганди. Бу гап қанчалик ҳақиқатга яқин?
— Менга ҳеч ким бундай таклиф билан чиқмаган. Бу гапни илк бор сиздан эшитишим.

— Про лигадаги асосий рақобатчиларингиз қайси жамоалар саналади?
— Аввал айтганимдек, лигада кучсиз жамоанинг ўзи йўқ. Чемпионат энди бошланди. Ҳали ҳаммаси олдинда. Бизда битта захира ўйини мавжуд. Мавжуд ўйинларда очко олишга ҳаракат қиламиз.