Xabi Alonso boshqaruvidagi «Bayer» Germaniya Bundesligasi 29-turida CHL yo‘llanmasiga yaqqol da’vogar «RB Leypsig»ni qabul qilib, 2:0 hisobida g‘alaba qozondi.

Shu tariqa «dorishunoslar»ning mag‘lubiyatsiz odimlari 13ta o‘yinga yetdi. Boshqacha aytganda, Alonso jamoasi o‘zi ishtirok etayotgan barcha turnirlarda qatorasiga 13ta o‘yindan buyon mag‘lubiyat atalmish «achchiq tabletka»ni ichayotgani yo‘q. Ispaniyalik mutaxassis shogirdlari bu seriya davomida 10ta g‘alaba va 3ta durang qayd etishdi.

Alohida aytish kerak, Xabi Alonso ish boshlagan pallada Leverkuzen klubi Bundesliga turnir jadvalida «ilinib» turgandi. Qarangki, «dorishunoslar» shundan buyon faqat olg‘a qadam bosishyapti va endi 6-o‘ringa ko‘tarilib oldilar. «Bayer» shu sur’atini saqlab qolsa, hattoki, CHL hududi (kuchli to‘rtlik)ga kirib olishi ham mumkin.

* 13ta o‘yindan iborat mag‘lubiyatsiz seriya jamoa hayotida 2017 yildan kuzatilmayotgandi (o‘sha vaqt jamoani Xayko Xerrlix boshqargan).

* «Bayer» mag‘lubiyatsiz seriya davomida qatorasiga 7ta o‘yinni o‘z foydasiga hal qildi. Bunisi jamoa tarixidagi rekordning takrorlanishidir.