Xalqaro sport tadqiqotlari markazi (CIES Football Observatory) jahon futbolidagi 20 yoshgacha bo‘lgan istiqbolli o‘yinchilarning top-200 lik ro‘yxatini e’lon qildi.

Portal o‘nta pozisiyaning har birida 20 nafardan eng iqtidorli futbolchilarni tanlab olgan.

Markaziy himoyachilar reytingidan ayni vaqtda Belarusning “Energetik-BGU” sharafini himoya qilayotgan o‘zbekistonlik Abduqodir Husanov ham o‘rin olgan.

Husanov Belarus oliy divizionining joriy mavsumida jamoasining barcha 5 ta o‘yinida to‘liq ishtirok etdi va bitta gol urishga erishdi. 19 yoshli futbolchi o‘tgan mavsum liga doirasida 27 ta o‘yin o‘tkazib, 3 gol va 2 ta golli uzatmaga muallif bo‘lgan.

Shuningdek, Abduqodir O‘zbekiston yoshlar terma jamoasi safida U-20 Osiyo Kubogi—2023 musobaqasi g‘olibiga aylangandi.

CIES talqini bo‘yicha har bir pozisiya bo‘yicha eng yaxshilar:

— Plamen Andreev (“Levski Sofiya”, darvozabon)
— Antoniu Silva (“Benfika”, markaziy himoya)
— Alexandro Balde (“Barselona”, chap qanot himoya)
— Riko Lyuis (“Manchester Siti”, o‘ng qanot himoya)
— Artur Vermeren (“Antverpen”, tayanch yarim himoya)
— Pablo Gavi (“Barselona”, markaziy yarim himoya)
— Bilol al-Xannuss (“Genk”, hujumkor yarim himoya)
— Mateus Martins (“Uotford”, chap qanot vinger)
— Anjelo Borjes (“Santos”, o‘ng qanot vinger)
— Markos Leonardo (“Santos”, markaziy hujum).