Superliga 9-turidan o‘rin olgan «Buxoro» – «Metallurg» (1:0) uchrashuvidan so‘ng mezbonlar ustozi o‘z fikrlarini bildirib o‘tdi.

“Bu mavsum o‘z maydonimizdagi ilk g‘alabani qo‘lga kiritdik. Uchrashuvdan oldin yigitlarda ruhiy bosim mavjud edi. Mashg‘ulotlarda barchasi o‘xshamoqda, ammo o‘ylaganlarimiz o‘yinda u qadar o‘xshamayapti. Bugun tartibli harakat qildik va natija uchun o‘ynadik.

Klubdagi barcha jamoani yuqori o‘rinlarga chiqishini istaydi. Ammo buning uchun vaqt kerak. Avvalo yosh iqtidorlarni tarbiyalash, seleksiya olib borish, klubdagi infratuzilmani yaxshilash, ishonch va albatta sabr kerak. Barchasi amalga oshirilsa, «So‘g‘diyona»da ko‘rsatgan natijadan ham yaxshisiga erishish mumkin. Biroq bu haqida gapirishga hali erta, bosqichma-bosqich harakat qilib boramiz.

Iminovning zaxiradan maydonga tushishi oldindan rejalashtirilgan edi. So‘nggi 20-25 daqiqada o‘yinimizni kuchaytiradigan futbolchini maydonga tushirishimiz zarur edi”. – dedi Baqoyev.