"Inter" bosh murabbiyi Simone Indzagi "Milan"ga qarshi o‘yin haqida fikr bildirdi.
Chempionlar ligasi yarim finalining birinchi o‘yinida “neradzurrilar” 2:0 hisobida g‘alaba qozondi.
“Biz ikkitadan ko‘proq gol urishimiz mumkin edi, ammo bu ajoyib o‘yin bo‘ldi. Biz allaqachon bir necha turdan o‘tganmiz, biz oldinda ekanligimizni bilamiz. Endi ikkinchi o‘yin bo‘ladi, muxlislarimiz biz bilan birga bo‘lishadi va orzuni ro‘yobga chiqarish uchun hali ko‘p harakat qilishimiz kerakligini aniq bilamiz.
Futbolchilarimiz ongli o‘ynashdi, maydonning har bir qarichini nazorat qilishdi va zaxiradan maydonga tushganlar bizga yordam berishdi. Hozir baxtli bo‘lish to‘g‘ri, lekin biz hali ham nimadir yetishmayotganimizni bilamiz.
72 soatdan so‘ng bizni "Sassuolo"ga qarshi juda muhim o‘yin kutib turibdi, biz jismoniy va ruhiy jihatdan tiklanishimiz kerak. Bu o‘yinlar juda katta energiya talab qiladi, hozir biz futbolchilarning holatiga baho berishimiz kerak.
Ba’zi o‘yinchilar maydonni charchagan holda tark etishdi va bizda shanba kungi "Sassuolo"ga qarshi o‘yinga tayyorgarlik ko‘rish uchun shu uch kun vaqtimiz bor. Biz eng yaxshi tarzda tayyorlanamiz” - dedi Indzagi Prime Video bilan suhbatda.
