O‘zbekiston milliy jamoasi sardori Eldor Shomurodov Osiyo kubogi-2023 guruh bosqichi uchun tashlangan qur’a haqida o‘z fikrlarini bildirib o‘tdi.

"Guruhdagi raqiblarimiz haqida to‘xtalib o‘tadigan bo‘lsam, birinchi navbatda Avstraliya terma jamoasini aytib o‘tishim mumkin. Bu jamoa ko‘p marta jahon chempionatida ishtirok etgan. Avstraliya — Osiyoning eng kuchli jamoalaridan biri.

Suriya terma jamoasi bizga o‘rtoqlik o‘yinlarida ko‘p ishtirok etgan, bizga yaxshi tanish bo‘lgan terma jamoa. Hindistonda esa futbol rivojlanib bormoqda.

O‘zbekiston terma jamoasining birinchi navbatdagi vazifasi — guruhdan maksimal ochko bilan keyingi bosqichga chiqish. Nasib qilsa, bu galgi turnirda avvalgi Osiyo chempionatiga nisbatan yaxshiroq natija qayd etamiz, degan umiddaman", — dedi Shomurodov O‘FA matbuot xizmatiga bergan intervyusida.