Toshkentda o‘tkazilayotgan boks bo‘yicha erkaklar o‘rtasidagi jahon chempionatida bugun 6ta, ertaga esa 7 ta vaznda final janglari o‘tkazilishi haqida xabar berib o‘tgandik. Bugungi final janglari boshlandi.

67 kg vazndagi vakilimiz Asadxo‘ja Mo‘ydinxo‘jayev oltin medal uchun qozog‘istonlik Dulat Bekbauovga qarshi ringga ko‘tarildi. Hamyurtimiz oyoq harakati, tezlik borasida ustunligidan unumli foydalanib, raqibga nisbatan ko‘proq zarba berishga urindi. Dulat esa kuchli zarba bilan vatandoshimizni esankiratib qo‘yishga va shu orqali jangni o‘z foydasiga hal etish payida bo‘ldi.

Asadxo‘ja dastlabki ikki raundda tanlangan to‘g‘ri taktika evaziga ustunlikka erishdi. Uchinchi raund boshida esa hamyurtimiz raqibning ikkita kuchli zarbasini o‘tkazib yubordi. Ammo keyinchalik o‘ziga kelib olib, jangni o‘z foydasiga hal qildi — 5:0.  

Shu tariqa, Asadxo‘ja Mo‘ydinxo‘jayev faoliyati davomida ilk marta jahon chempioniga aylandi.

Ma’lumot o‘rnida. 48 kg. vazn toifasida Sanjar Tashkenbay (Qozog‘iston) finalda Saxil Alaxverdovi (Gruziya)ni mag‘lub etib, Qozog‘istonga dastlabki oltin medalni taqdim etgandi.