«PSJ» himoyachisi Markinyos fransuz klubi bilan shartnomasini uzaytirdi.

Bu haqda parijliklar rasmiy sayti xabar bermoqda. Braziliyalik futbolchining «PSJ» bilan yangi shartnomasi 2028 yilgacha mo‘ljallangan.

Klub saytiga bergan intervyusida Markinyos shartnoma uzaytirilganidan juda mamnun ekanligi va bundan juda faxrlanishini tan oldi.

Futbolchi bu o‘zi uchun o‘ziga xos lahza ekanligini va «PSJ» yaqin kelajakda katta muvaffaqiyatlarga erishishiga ishonchi komil ekanligini ta’kidladi.

Joriy mavsumda 29 yoshli futbolchi barcha musobaqalarda 42 ta o‘yinda maydonga tushib, 2 ta gol urdi va bitta golli uzatmani amalga oshirdi.

35-turdan so‘ng «PSJ» 81 ochko bilan Fransiya chempionatida peshqadamlik qilmoqda.