Argentina yoshlar terma jamoasi bosh murabbiyi Xavyer Maskerano O‘zbekistonga qarshi bo‘lib o‘tgan uchrashuv (2:1) borasida o‘z fikrlari bilan o‘rtoqlashdi.

"O‘zbekiston qiyin raqib ekanini bilardik. Bu jamoa Osiyo chempioni hisoblanadi. Musobaqaning ochilish o‘yini bo‘lgani uchun katta mehnat qilishga to‘g‘ri keldi. Birinchi o‘yin hamisha asabiylikni yuzaga keltiradi. Futbolchilardagi energiyani yaxshi tomonga yo‘naltirish uchun yigitlar bilan ko‘p gaplashishga harakat qildim. Vaqti-vaqti bilan o‘zimiz istagandek o‘ynadik, ammo o‘z ustimizda ishlashda davom etishimiz kerak.

Ikkinchi taymda charchoq sezila boshladi va o‘yinimizga o‘zgartirishlar kiritdik. Barcha muxlislar sizni qo‘llab-quvvatlayotgan stadionda o‘ynashdan yaxshirog‘i yo‘q. Jahon chempionatida ishtirok etish — katta mas’uliyat . Ammo men futbolchilar bilan gaplashib, turnirdan maroq olishlari kerakligini tushuntiryapman. O‘yindan-o‘yinga o‘sib borishga harakat qilamiz", — dedi Maskerano.