O‘zbekistonlik grossmeyster Nodirbek Abdusattorov (2731) shaxmat bo‘yicha ChessKid Cup—2023 onlayn musobaqasi grand finalida ishtirok etdi.

Abdusattorov grand finalda amerikalik Fabiano Karuanaga qarshi dona surdi va g‘alaba qozondi. Shaxmatchilar o‘rtasidagi dastlabki o‘yinda durang qayd etildi. Ikkinchi partiyada Karuana oq donalarda o‘ynab, g‘alaba qozondi. Uchinchi o‘yinda esa Abdusattorov oq donalarda g‘alabaga erishib, hisobni tenglashtirdi.

So‘nggi o‘yinda esa Nodirbek qora donalarda o‘ynaganiga qaramay, chiroyli g‘alabani qo‘lga kiritib, raqibini mot qilishga erishdi — 2,5 - 1,5.

Qayd etib o‘tish kerak, Nodirbek Karuana ustidan ikkinchi marta g‘olib bo‘ldi. Ikkala shaxmatchi yarim finalda to‘qnash kelgandi va unda ham o‘zbekistonlik shaxmatchi ustunlik qilgan.

Qayd etish kerak, Nodirbek musobaqaning dastlabki bosqichida Mussarni mag‘lub etgandi. Finalda esa Yorden van Forest taslim etilgandi.