«Liverpul» tolmas Jeyms Milner bilan munosib tarzda xayrlashmoqda.

Jumladan, «Enfild» stadioni xodimlari tomonidan faxriy futbolchiga original sovg‘a tortiq etildi. Ma’noli va esda qoladigan ajoyib sovg‘a!

Ha, «Enfild»ning ahil jamoasi Jeyms Milnerni «Liverpul» libosidagi oxirgi o‘yini oldidan maxsus xayrlashuv sovg‘asi bilan siyladi. 37 yoshli futbolchi afsonaviy «Kop» yaqinida joylashgan 11 metrlik nuqta maydonidan kesib olingan bir bo‘lagini qabul qilib oldi. Sovg‘aga ilova qilingan yozuv ham zo‘r: «Jeymsga. 8 yil davomida nuqtalarimizni yo‘qotish bilan shug‘ullangani uchun! Marhamat, endi o‘zing 1ta nuqtaga g‘amxo‘rlik qilib ko‘r».

Bu sovg‘a aniq ma’noga ega, albatta. Binobarin, Milner penaltidan gol urish qobiliyati bilan ham tanildi. Raqamlarda aytsak, «Liverpul»dagi 8 yillik faoliyati davomida 11 metrlik nuqtadan 19 marta muvaffaqiyatli zarba yo‘lladi.

E’tiborlisi, yarim himoyachi bunday noodatiy sovg‘a suratini ijtimoiy tarmoqlardagi sahifasiga qo‘ydi va yanada mazmunli izoh qoldirdi: «Qanday zo‘r sovg‘a! Bosim yo‘q, lekin qaychi va pushtirang chizg‘ichimni qo‘lga olmasam bo‘ldi...» Qiziq, Milner «Enfild»dan olingan shaxsiy chim bo‘lagini qayerda saqlarkin?